Gya yiu

Welcome to the Mbula Bible translation site.

We have completed the consultant checking of the entire NT and are at the stage of typesetting now.

We wish to have some of the NT books translated to Mbula published on this website for our people, far and near. In addition also we wish let our people know of the Mbula Dictionary of over 7,000 word entry, the Primers developed for learning to read in Mbula, and a host of other information.

Posted in Uncategorized | Leave a comment

Synopsis on Mbula Bible Translation and Language Development

Wun amǝ Mbula wu lo! Tǎlaban sulǝna.

Cau mala Ɓakuli a bǝshe nǝ kun maˈsǝm nia kǝ yiu ka.

   Have you heard about the Mbula Bible Translation and Language Development?

Do you know that the Translation has been going on since April 2007 and almost  coming to end?

Are you aware that primers for learning to read and write in Mbula language  have been developed?

Are you informed that, at the moment a sensitization/awareness program has been going on in Mbula land to prepare people’s heart for the training of persons to teach reading, writing and speaking in Mbula language?

Do you know that the Mbula Dictionary of over 7,000 word entry as of now, is on          process?

Have you watched the video of Jesusˈ Parables of ˈThe Prodigal Son,’ ˈThe Good            Samaritan,’ and ˈThe Unmerciful Servantˈ in Mbula language, which is presently in circulation?

Do you know that preparations are on the way to have the Jesus Film (Sǝnǝma mala Yesu) in Mbula Language?

Do you know that modalities are being worked out to have the Mbula Audio Bible?

Do not be left out. Play a part in these great historical events that are going on in the Mbula Nation far and near.

For the past seven years hands have been on the deck, by men and women of sacrifice and faith, through nights and days of tireless toiling, and personal/church contributions, in order to be God’s channels for the flow of these bountiful blessings, which are now coming for every Mbula person.

More hands are needed, of persons of kindred heart for Mbula, to come in with their tributes of contribution, whether personal or collectively in the way they can, for these blessings to be fully realized. Offer yourself to advance the cause of Mbula and to bring honour to our Lord and Saviour Jesus Christ.

The time when people ask, “What can Mbula do for me” has passed and gone.

This is the time to ask, “WHAT CAN I DO FOR MBULA AND FOR JESUS CHRIST?”

There’s something with you that is meant for God to use for Mbula. Will you release it?

Ɓǝ ɓwamuru mala Mǝtala sǝm Yesu Kǝrǝsti, andǝ earcearu mala Ɓakuli, andǝ dotaru mala Bangŋo Mǝfele do ata sǝm ado andǝ mana mala male pàkàm raka. Amin.

For more information visit the website: mbula.ngbible.com

For inquiries write to: mbulapeople@yahoo.com

Or call: 08058008832, 08062527386, 08036172073, 08025526277.

For financial support use Account No: 2023291225, Bank: First Bank, Account Name: Mbula Bible Translation and Language Development. Ask for receipt for any monetary donations made.

 

Posted in Uncategorized | Leave a comment

Cautera mala Bulǝs aban ká aban amǝ Roma

Pauls Letter to the Romans in Mbula language of Nigeria, Trial edition.

© 2014 Nigeria Bible Translation Trust; P.O. Box 790, Jos, Nigeria, In cooperation with Mbula Language Development and Bible Translation Project, P. O. Box 505, Yola Adamawa State.

For inquiries, write to: mbulapeople@yahoo.com. For financial support use Account No: 2023291225, Bank: First Bank, Account Name: Mbula Bible Translation and Language Development. Ask for receipt for any monetary donations made.

Cautera mala Bulǝs aban ká aban

AMƏ ROMA

MƏNCAU

Cautera mala Bulǝs aban ká aban amǝ Roma ka Bulǝs nǝ gili a wario male a Korinti a masǝlata tàruia gya mishan male (sǝn Aturo mala Amǝmishan 20:2-3). Gili ace lǝmndǝ ɓamuri aban amǝkwaɗi mǝnana a Roma, sǝ ace gilǝki njar mala yiu male, mǝnana ndani a ɓabumi nǝ yiua sǝn ikǝlisiya malea ka. Kane male ka nda mǝnana ama nǝ yia pak turo aɓalǝ amǝkwaɗi mǝnana abanì ka zuku, sǝ ɓǝ̀ nǝ̀ kutio aban ká Sǝpen ngga, à nǝ̀ bwali wi kam nǝ pa gbasha. Gilia wia ace bǝlki ɓalǝ bwaltagir male amur paɓamuru mǝnana ndakam aɓa kpata Kǝrǝsti, andǝ gir mǝnana paɓamuru aban Kǝrǝsti kǝ yini aɓa do yilǝmu mala amǝkwaɗi ka. Aɓa mǝnia yi cautera ka Bulǝs bǝlki ɓa mugulacau mala Cau Yilǝmu mala Ɓakuli, mǝnana ama, aɓwapǝnda kat ka à nda aɓa ɓealu mǝɓane mala cauɓikea sǝ auwa pà kàm ɗang. Ɗǝm ngga, sǝm kat ka sǝm nda ka amǝcauɓikea a ɓadǝm Ɓakuli, kun nacau pà kàm ɗang. Sǝama Ɓakuli gilikina njar mala puri ɓa mǝnia yi ɓealu nggea mǝɓike andǝ mǝpa ɓangciuì ka, mǝnana yi túr Muni Yesu ɓǝ yi wú ace acauɓikea ma’sǝm ngga. Nǝ́ ɓwamuru male ka, Ɓakuli kǝ twal sǝm, sǝm mǝnana sǝm pa ɓamur sǝm aban Kǝrǝsti ka, sǝm nda ka amǝ’cauɓoarna abani. Nǝ paɓamuru ka, dupǝna sǝm pup ɓǝ sǝm ak mǝnia yi ɓoro mala Ɓakuli ka, sǝ ɓǝ sǝm tita dukdo mala amǝ kpata Kǝrǝsti. Mǝnia yi Cau Amsǝban mǝgule ka dumǝna pup à nǝ̀ hamni a koya ban, a njar mala turo mǝnana à pur ate à nǝ̀ pe ace káne aban aɓwana aɓa ɓanza kat, aban amǝ Yahudi andǝ aɓwana mǝnana amǝ Yahudi na raka.

Anzǝm mǝnana pana makkun male aban ikǝlisiya mala amǝ Roma, andǝ banggia wia acau amur hiwi male acea ka, Bulǝs kwakita murcau mala cautera male ani: “Cau Amsǝban ngga kǝ lǝmndǝ lang sǝ Ɓakuli kǝ yinǝ aɓwana ɓǝa kum gilǝkya andi: Mǝnia ka kǝ gandǝ pa nǝ paɓamuru aban Kǝrǝsti, twal a tite aban ká masǝlate.” (1.17)

Bulǝs pǝla kutia ɓak cau mǝnana kwakite ka ani: Ɓwapǝnda kat, amǝ Yahudi andǝ aɓwana mǝnana amǝ Yahudi na raka, à nda aɓa ɗwanyi gilǝkya andǝa Ɓakuli, acemǝnana aɓwana kat ka kǝgir gauwia ɗang. À nda aɓata rǝcanda mala cauɓikea. Aɓwana kǝ kum gilǝkya andǝa Ɓakuli nǝ paɓamuru aban Yesu Kǝrǝsti. Bulǝs nyare bǝlki ba bǝsa yilǝmu mǝnana ndakam aɓa kpapimuru andǝ Kǝrǝsti, mǝnana kǝ yiu nǝ mǝnia yi bǝsa kpapi dotaru andǝa Ɓakuli ka. Ɓwa mǝnana earǝna nǝ Kǝrǝsti ka ndane dorǝpwala andǝa Ɓakuli, sǝ Bangngo mala Ɓakuli panzǝni a ɓabu rǝcanda mala cauɓikea andǝ lú. Aɓa kure 5–8 ka, Bulǝs bang cau amur gir mǝnana Ɓakuli earkiyice nǝ́ pa Nggurcau male andǝ pa Bangngo mala Ɓakuli aɓa do yilǝmu mala mǝkwaɗi ka. Pǝla yi, mǝmishan ngga kutia ɓa tanniki mala bǝlki ɓa nggea cau mala lang sǝ amǝ Yahudi andǝ aɓwana mǝnana amǝ Yahudi na raka à kum bancame malea aɓa kane mala Ɓakuli ace ɓwapǝnda. Yi masǝli nǝ bangcau ama ɓine mǝnana amǝ Yahudi ɓinǝ Yesu ka, nda aɓa kane mǝnana Ɓakuli ndani ace yinǝ aɓwapǝnda kat aɓa ɓwamuru male aɓa Yesu Kǝrǝsti, sǝ yi ka earǝna ama amǝ Yahudi pà nǝ̀ uekam anggo aɓa ginǝki Yesu ɗang. Aban ká masǝlate ka Bulǝs gilǝgir amur lang sǝ amǝkwaɗi nǝ dukdo kpata Kǝrǝsti, nggea-murǝmi ka amur njar mala lǝmndǝ earcearu aɓa dotaru nǝ aɓwana. Banggia acau amur paki Ɓakuli turo, andǝ agir mǝnana pup amǝkwaɗi nǝ nggǝ paki a rǝaria sǝ à nǝ nggǝ pe ace nzali malea, andǝ cau mala kpata gir mǝnana à sǝlǝna a ɓabumia nda ɓoaro ɓǝa pe ka. Bulǝs yi gir mǝnia yi cautera ka nǝ makkiakun andǝ ɓwangsǝki Ɓakuli.

Agir nakam pas mǝnana sǝm nǝ kànì aɓa Cautera mala Bulǝs aban ká aban amǝ Roma, mǝnana à ndanǝ ɓoaro ace do kwaɗi ma’sǝm mala ko ya pwari ka: (1) Sǝm kat ka, sǝm nggǝ tapiki nǝ earce puri ɓa cauɓikea mǝnana sǝm nda aɓali a do ma’sǝm koya pwari ka, sǝ kǝɓwa pà kàm ata sǝm nǝ kum yilǝmu mǝnana málá male pà kàm raka ko ɓǝ mana girì na sǝm pakkiyi ka. (2) Ɓakuli gilikina njar mǝnana sǝm nǝ kum amsǝban ni a bu kurban mala cauɓikea ka, mǝnana yi túr Muni Yesu ɓǝ yi wú amur nggun-gangndi ka; nǝ paɓamuru aban Yesu ka sǝm nǝ kum ɓoro mala yilǝmu mǝnana málá male pà kàm raka nǝ ɓwamuru mala Ɓakuli. (3) Ɓǝ sǝm yinǝ ɓamur sǝm mwashat sǝnǝa Kǝrǝsti aɓa lú andǝ loapi ɓembe male, sǝ nǝ rǝcanda mala Bangngo male Ɓakuli mǝnana túrǝnaban ni ka, sǝm nǝ gandǝ kum panzǝban a bu rǝcanda mala cauɓikea andǝ lú. (4) Sǝm kǝla amǝkwaɗi ka, dumǝna pup sǝm nǝ lǝmndi Ɓakuli yauwa ma’sǝm nǝ paki wi turo aɓa koya njari mala do ma’sǝm andǝ lǝmndǝ earcearu aban aɓi sǝm aɓwana, ace ɓwamuru male mǝnana amsǝ sǝm ngga. (5) Ndanǝ ɓoaro ɓǝ sǝm ɗenyi pepe nǝ amǝkwaɗi mǝnana à pànǝ rǝcanda raka, ɓǝ sǝm nggǝ sungngo abania aɓa ɗenyi nǝ gattya malea, andǝ pa gbasha, andǝ earcearu.

 

Agir mǝnana a ɓali ka

Aɓwana mǝnana amǝ Yahudi na raka andǝ cauɓikea 1:1-32

Amǝ Yahudi andǝ cauɓikea 2:1-29

Njar amsǝban mala Ɓakuli 3:1–4:25

Paɓamuru andǝ nggurcau 5:1-21

Bǝsa yilǝmu aɓa Kǝrǝsti 6:1-21

Bangngo Mǝfele aɓa do mala mǝkwaɗi 8:1-17

Isǝrayila aɓa kane mala Ɓakuli 9:1–11:32

Ɓealu mala amǝkwaɗi 12:1–15:13

Masǝlata cau andǝ makkiakun 15:14–16:27

1

Makkun mala Bulǝs

1 Mǝnia yi cautera ka pur nǝban Bulǝs, guro mala Kǝrǝsti Yesu, mǝnana Ɓakuli tuni ɓǝ duk mǝmishan, sǝ tarì ace turo hamnǝ Cau Amsǝban male ka. 2 Ɓakuli pacau ace mǝnia yi Cau Amsǝban ngga, ɓara-ɓara nǝban amǝɓangna male aɓa Malǝmce Mǝfele. 3 Cau Amsǝban ngga, ndá amur Muni, mǝnana do ɓanza male ka à ɓǝli a tau mala Dauda. 4 Sǝ à yi lǝmndí, Muna mala Ɓakuli na, nǝ loaso mǝnana à loashi a ɓembe nǝ rǝcanda mala Bangngo Mǝfele ka. Yi nda Yesu Kǝrǝsti Mǝtala sǝm. 5 Nǝban Kǝrǝsti sǝ Ɓakuli pa sǝm ɓwamuru andǝ ɓoro mala do mǝ’mishan, ɓǝ sǝm ne aɓwana arǝ anzali a koya ban ngga, gir mǝnana Ɓakuli pa acea ka, ace mǝnana ɓǝa paɓamuria, ɓǝa oki wi sǝ anggo ka lulli ɓǝ kum gulo. 6 Wun ngga, wu nda aɓalǝ aɓwana mǝnana à tunia ɓǝa duk amala Yesu Kǝrǝsti ka.

7 Ən nggǝ gila wun, wun kat a Roma, mǝnana Ɓakuli earcea sǝ tunia ɓǝa duk amale ka. Ɓǝ̀ Ɓakuli Tar sǝm andǝ Mǝtalabangngo Yesu Kǝrǝsti, pa wun ɓwamuru andǝ dorǝpwala.

Bulǝs earǝna ce ka Roma

8 A tite ka, ǝn nggǝ paki Ɓakuli yauwa nǝban Yesu Kǝrǝsti ace wun kat, acemǝnana paɓamuru ma’wun abani ka, ɓanza kat ongngǝna ce. 9 Ɓakuli mǝnana ǝn nggǝ paki wi turo nǝ ɓabumam kat, aɓa hamnǝ Cau Amsǝban mala Muni ka, nda mǝ’nakunam ama ǝn nggǝ pak hiwi ace wun tutu. 10 Aɓa hiwi mem koya pwari ka, ǝn nggǝ zǝmba ɓǝ Ɓakuli ear ka, ko ɓǝ lang ngga ɓǝ ǝn kum njar a masǝlate ɓǝ ǝn kyane aban wun.

11 Acemǝnana ǝn earce kǝrkǝr a ɓabuman ɓǝ ǝn kya sǝn wun, ɓǝ ǝn pa wun aɓoro ɓa Bangngo mǝnana nǝ pa wun rǝcanda ka. 12 Ɓǝ sǝm yina atarǝ sǝm ngga, ǝn nggǝ earce ɓak ɓabum wun aɓa paɓamuru ma’wun, sǝ aɓa pe mǝno anggo ka, mim gbal ka mǝ nǝ kum ɓakɓabum aban wun. 13 Wun amǝ’eambam, ǝn nggǝ earce ɓǝ wu sǝla ama ǝn kani a ɓabumam kusǝ pas mǝ nǝ yiu a sǝn wun, sǝ ǝn kum njar ɗang, ba ado. Ən nggǝ earce yinǝ aɓwana aɓalǝ wun aban Yesu kǝla mǝnana ǝn kum aɓea aɓwana aɓalǝ akún arǝ aɓea anzali ka.

14 Dumǝnam pup ɓǝ ǝn paki amǝ Gǝrik andǝ aɓwana mǝnana amǝ Gǝrik na raka turo, amǝ sǝle andǝ amǝ ɗwanyi sǝle. 15 Ace mani ka, ɓabumam kǝ pi arǝ ká aban wun gbal, wun mǝnana aɓa Roma ka, ɓǝ ǝn kya hamnǝ Cau Amsǝban.

Rǝcanda mala Cau Amsǝban mala Ɓakuli

16 Mim ngga kǝsǝkya kǝ pakam arǝ Cau Amsǝban mala Kǝrǝsti ɗang, acemǝnana mǝnia ka rǝcanda mala Ɓakuli na ace amsǝ aɓwana mana à paɓamuria ka, tite nǝ ɓwa Yahudi, sǝ ɓwa mǝnana ɓwa Yahudi na raka. 17 Yi Cau Amsǝban ngga, ndá kǝ̀ lǝmnda sǝm lang sǝ Ɓakuli kǝ nggaɗi sǝm, ɓǝ sǝm pǝlǝ aɓwana amǝɓoarne a ɓadǝmbi. Mǝnia ka kǝ pa anggo nǝ guli arǝ Kǝrǝsti, twal a tite kya pur a masǝlate, kǝla mǝnana Malǝmce na ka ama: “Ɓwa mǝnana kumǝna akban aban Ɓakuli ka nǝ dumnǝ yilǝmu nǝ guli arǝ Ɓakulia.”

Bumlulla mala Ɓakuli amur cauɓikea

18 Ɓakuli kǝ lǝmndǝ bumlulla male nǝ kuli amur amǝ’cauɓikea andǝ amǝ’ɓealɓikea mǝnana à kǝ par mǝsǝcau nǝ aɓealɓikea malea ka. 19 Ɓakuli kǝ pea wia tanni, acemǝnana gir mana ɓoaro ɓǝa suri amur Ɓakuli ka, sǝmbǝria wia ɗang, acemǝnana Ɓakuli lǝmndǝnia wia. 20 Ɗiɗyal mǝnana Ɓakuli pusǝ ɓanza ka, ɓwapǝnda sǝnǝna nzali andǝ kuli. Nǝ agir mǝnana Ɓakuli pea ka, à sǝnǝna aɓǝalu male bwang, kǝla rǝcanda male mana kǝ mal raka, andǝ pǎ male mala do Ɓakuli. Ace mani ka, à pà nǝ kun nacau ace ɗwanyi surǝ Ɓakuli ɗang ko bǝti!

21 E, à surǝna Ɓakuli, sǝ à ɓinǝ peri abani kǝla Ɓakuli, à kǝ paki wi yauwa ɗang. Akun mani ka, ɗenyicau malea pǝlǝ mǝɓane, sǝ ɓabumia do a pǝnda. 22 A ne malea ka, à nda ka amǝsǝle, sǝa ma yia ka, à kwar ɗang. 23 Amur mǝnana ɓǝa peri aban Ɓakuli mǝnana nǝ yilǝmu málá male pà kàm raka, à kara à kutia peri aban aɓǝnzal mǝnana à pea kǝla ɓwapǝnda andǝ anyal, andǝ agirkusu andǝ agir-nzali ka.

24 Ace mani ka, Ɓakuli vwaki bui aria aɓa pakia agir mɓeami malea mala nonggi nǝ rǝaru, mǝnana ɓabumia earkiyi ce ka, sǝ à kutia pakia agir kǝsǝkya arǝaria. 25 Yia ka à nggaɗi mǝsǝcau mala Ɓakuli nǝ nyir, sǝ à kǝ peri aban agir mǝnana Ɓakuli pushia ka, à ɗeki nggearǝ Ɓakuli mǝnana pusǝ agir kat, mǝnana ɓoaro ɓǝa kpate, ɓǝa ɓwangshi ba ka! Amin.

26 Acemǝnana à pa anggo ka, nda Ɓakuli nyia aɓalǝ anpel mala agir kǝsǝkya malea. Nggearǝ amamǝna malea ka à nying dolabura, à kǝ pak mɓwama nǝ rǝaria. 27 Anggo gbal sǝ aburana nying nongngo nǝ amalia, à kuti aban nonggi nǝ rǝaria. Aburana kǝ pak agir kǝsǝkya nǝ rǝaria. Nda gir mǝnana tsa sǝ à nunmbi ɓamuria ɓashi andǝ tanni, ata cau mala mǝno yi agir mǝɓane mǝnana à kǝ pakia ka.

28 Acemǝnana amǝno yi aɓwana ka à ɓinǝ pak turo nǝ sǝle mala Ɓakuli ka, Ɓakuli nyia gbal andǝ aɗenyicau mǝɓane malea, ɗekia ɓǝa pakia agir mǝnana ɓoaro ɓǝa pea raka. 29 Yia ka, do malea lumsǝ nǝ koya ulang turo ɓealɓikea, andǝ nɓali, andǝ ɓinǝmuru andǝ mwararu, andǝ walkialu, andǝ munǝkiamuno, andǝ swarkiban, andǝ ce’shiria, andǝ twal lullú. 30 Yia ka à kǝ nacau mǝɓane anzǝm aɓwana, amǝ’ɓinǝ mur Ɓakuli na, à kǝ okban ɗang, à ndanǝ twalmuru, andǝ nggori. Ɗenyicau malea ka nda aɓa pusǝki aɓǝsa njar mala pakia agir mǝɓane, sǝ à kǝ oki amǝɓǝlia ɗang. 31 À pànǝ ɓabum ɗang, à kǝ lumsǝ cau malea mǝnana à ne ka ɗang. Yia ka à lǝmndǝkiyi pe mǝɓoarne ɗang, sǝ à pànǝ mǝsǝswatǝr arǝ aɓwana ɗang. 32 À sǝlǝna ama nzongcau mala Ɓakuli bangnga ama, aɓwana mǝnana à kǝ pakia ulang amǝnia yi agir ka, à nǝ̀ ká lú. Sǝ kat andǝ sǝle mǝno ka à go amur pakia agiri nǝmuria ɗang, à kǝ ear nǝ aɓwana mǝnana à kǝ pakia agirì ka.

2

Ɓashi mǝɓafoe mala Ɓakuli amur cauɓikea

1 We ka a kǝ twali ama a nǝ́ paki amǝno yi aɓwana ka ɓashi, sǝ a nda kǝla yia nǝ ɓealɓikea, a pa nǝ kun nacau ɗang! Ɓǝ we ka a na ama yia ka amǝɓealɓikea na ɓǝa pea wia tanni ka, a ndaban paki ɓamuro ɓashi, acemǝnana we mana a kǝ ɓashi aɓea ɓwana ka, kǝ àkǝ̀ girǐ na gbal a pakkiyi ka. 2 Sǝm sǝlǝna ama Ɓakuli aɓa pe male mala kpata mǝsǝcau ka, nǝ̀ ɓashi koyana mǝnana pakkiyi a’ulang agir mǝnana ani ka. 3 Mǝnana a kǝ ɓashi aɓwana ace paki amǝnia yi agir ka, a kǝ sǝni kǝla a nǝ api ɓashi mala Ɓakuli le, yi mana kǝ àkǝ̀ girǐ na a pakkiyi gbal ka? 4 We ka a sǝn nggea ɓwamuru, andǝ twal ganda, andǝ munyi mala Ɓakuli mǝnana ndani aro raka re? Mǝnia ka kǝgir na abano re? A sǝlǝ ado ama ɓwamuru male ka nda ace mǝnana nǝ nyeso wu pwanzali abani, wu nying buo arǝ cauɓikea ka re?

5 Sǝ acemǝnana we ka a ndanǝ murcanda, a ɓinǝ nying buo arǝ cauɓikea ka, a nda rǝ rambi ɓamuro candǝna tanni. Acemǝnana pwari mala bumlulla na kǝ yiu ka, mǝnana ɓashi mǝɓafoe mala Ɓakuli nǝ lǝmndǝ ri ka. 6 Ɓakuli nǝ ɓashi koyana le ka amur gir mǝnana ko ya ɓwa pak ka. 7 Aɓwana mǝnana à lidǝmba nǝ pe mǝɓoarne sǝ à kǝ alta ɓoarɓwa, andǝ gulo andǝ do api-lú nǝban Ɓakuli ka, Ɓakuli nǝ pea wia yilǝmu mǝnana málá male pà kàm raka. 8 Sǝ bumlulla andǝ bumpina male ka nǝ sulo amur amǝ’earce ɓamuria, andǝ amǝ’ɓinǝ kpata mǝsǝcau ace gyata ɓealɓikea. 9 Nggea tanni nakam andǝ rǝpina amur aɓwana mǝnana à lidǝmba nǝ gya aɓa ɓealɓikea ka. À nǝ̀ tite nǝ ɓwa Yahudi sǝ ɓwa mǝnana ɓwa Yahudi na raka. 10 Sǝ aɓwana mǝnana à kǝ pak mǝɓoarne ka, ɓoarɓwa andǝ gulo andǝ dorǝpwala mala Ɓakuli nǝ sulo amuria. Tite nǝ ɓwa Yahudi sǝ ɓwa mǝnana ɓwa Yahudi na raka. 11 Mǝnia ka nda acemǝnana Ɓakuli ka, kǝ lǝmndǝ earmuru ɗang.

12 Aɓwana mǝnana amǝ Yahudi na ɗang sǝ à surǝ Nggurcau mala Ɓakuli mǝnana pe Musa raka, ɓǝa pak cauɓikea ka à nǝ̀ kiɗikya. Ɓashi malea ka, pà nǝ̀ pang nǝ Nggurcau mala Ɓakuli mǝnana à gilì nǝ gile ka ɗang. Sǝ amǝnana à surǝ Nggurcau ka, à nǝ̀ ɓashia wia nǝ gir mǝnana Nggurcau na ka. 13 Sǝ pa ace ok Nggurcau nǝmuri sǝ ɓwa nǝ duk mǝɓoarne aban Ɓakuli ɗang, nda ataria andǝ pak agir mǝnana Nggurcau bang ngga. 14 Ko nggearǝ aɓwana mǝnana amǝ Yahudi na ɗang, mǝnana à pà nǝ́ Nggurcau mala Ɓakuli raka, ɓǝ ɗenyicau malea lǝmndia wia gir sǝ à pe, sǝ karǝ nǝ cau mǝnana Nggurcau bang ngga, yia ka à dumǝna nggurcau mala ɓamuria, kat andǝ amani ama à pà nǝ́ Nggurcau raka. 15 À lǝmndǝ aɓa pe ama Nggurcau mala Ɓakuli ka à gilǝni a ɓabumia, sǝ ɓabumia andǝ ɗenyicau malea ka, à kǝ lǝmndia wia ko à ɓwarkina, ko à nda ban pak mǝɓoarne. 16 Sǝ mǝnia ka nda Cau Amsǝban mǝnana ǝn nggǝ hamni ka, ama pwari na kǝ yiu ka, mana Ɓakuli nǝ bu Yesu Kǝrǝsti nǝ ɓashi aɓwana amur aɗenyicau ɓasǝmbǝra malea.

Amǝ Yahudi andǝ Nggurcau mala Musa

17 Sǝ we mǝnana a kǝ tunǝ ɓamuro ama a nda ɓwa Yahudi ka sǝ a kǝ guli arǝ Nggurcau ka: a kǝ nggori nǝ Ɓakuli; 18 a surǝna rǝgir mǝnana Ɓakuli earkiyi ce ama wu pak ka; a surǝna rǝ mǝsǝcau acemǝnana à kani no anggurcau male; 19 A ndanǝ sǝle kangkang ama a nda mǝbwalgara mala ante, sǝ a nda tǎlaban mala aɓwana mǝnana à do aɓwapǝnda ka, 20 a nda mǝkwarkir amǝ ɗwanyi sǝle andǝ mǝkania amuna gir aɓa njar mala Ɓakuli, acemǝnana kpapia mala surǝgir andǝ mǝsǝcau kat mǝnana ndakam aɓa Nggurcau ka nda a ɓabo. 21 We mǝnana a kǝ kani aɓwe gir ka, palang sǝ a pà nǝ́ kani ɓamuro ɗang? A kani aɓwe ama ɓǝa kǝa iun’i ɗang, sǝ we nǝ ɓamuro ka, a kǝ iu re? 22 A na ama ɓǝa kǝa nongnǝban nza ɗang, sǝ we ka a kǝ pak cauɓikea nongnǝban a nza re? A kǝ ɓinǝce ankúl, sǝ ama a kǝ pakturo nǝ agir mǝnana à iuwia nǝ iuwe a ndà mala alú ka re? 23 A kǝ nggori ama a surǝna rǝ Nggurcau mala Ɓakuli, sǝ ama à kǝ pe wi gulo ɗang, acemǝnana à kǝ pár Nggurcau male. 24 Pà ɓà ɗang sǝ Malǝmce bangnga ama, “Ace cau ma’wun, wun amǝ Yahudi sǝ aɓwana mǝnana arǝ acili anzali ka à kǝ pak ce Ɓakuli ɓà.”

25 Kasǝ-ɓatau ka ndanǝ gir mǝɓoarne ate ɓǝ wu kǝ kpata Nggurcau mala Ɓakuli ka. Sǝ ɓǝ wu kǝ pár Nggurcau mala Ɓakuli ka, wu dumǝna kǝla we ama à kasa wun ɓatau ɗang. 26 Sǝ aɓwana mǝnana amǝ Yahudi na raka, ɓǝa kpata Nggurcau mala Ɓakuli ka, Ɓakuli pá nǝ̀ twalia kǝla we ama à kasǝnia wia ɓatau re? 27 Mǝsǝcau ka, nda mǝnana ama aɓwana mǝnana à kasǝ ɓatea raka, mana à bwal Nggurcau mala Ɓakuli ka, à nǝ̀ mak wun nǝ ɓashi, wun amǝ Yahudi mana à kasǝ ɓata wun, wu ndanǝ Nggurcau mala Ɓakuli, sǝ wu kǝ kpate raka.

28 Duk ɓwa Yahudi mǝɓafoe ka pà acemǝnana ɓwa ka à ɓǝlì a tau mala amǝ Yahudi, ko acemǝnana à kashi wi ɓate ka ɗang. 29 Awo pa anggo ɗang, ɓwa Yahudi mǝɓafoe ka, nda ɓwa mǝnana ɓabumi ka à nggaɗini, nre gilikina andǝa Ɓakuli ka, sǝ mǝno ka turo mala Bangngo mala Ɓakuli na, kpata Nggurcau na ɗang. Ɓwa kǝla mǝno ka, ɓwangsǝban male kǝ pur aban ɓwapǝnda ɗang, kǝ pur nǝ ban Ɓakuli.

3

Ɓakuli ka kǝ nggaɗi ɗang

1 Nǝ mana sǝ duk ɓwa Yahudi ka kutina ban ni le? Ko a na raka, kasǝ-ɓatau ka kǝ gir na le? 2 E, duk ɓwa Yahudi ka agir mǝɓoarne nakam kpem aɓali! A tite ka Ɓakuli pea amǝ Yahudi acau male a buia.

3 Mǝsǝcau ka, aɓea ɓwana aɓalia ka à kpata cau mala Ɓakuli kǝla mǝnana à bangnga ama à nǝ̀ pak ka ɗang. Sǝ ɗwanyi kpata cau malea kǎ, nggaɗi domǝsǝcau mala Ɓakuli le? 4 Ko bǝti! Sǝ ɓǝ koyan ngga mǝ’nyir na ka, Ɓakuli ka mǝ’mǝsǝcaua. Kǝla mǝnana Malǝmce bang ngga:

“À nǝ̀ kumo nǝ mǝsǝcau aɓa cau mǝnana a na ka, sǝ ɓǝa wulio ka, a nǝ li ɓashi.”

5 Sǝ ɓǝ ɓealɓikea ma’sǝm kǝ lǝmndǝ cauɓoarna mala Ɓakuli ka, aman sǝ sǝm nǝ na le? Sǝm nǝ na ama Ɓakuli pangngǝna kpak, yi mǝnana ɓǝ so bumlulla male amur sǝm ngga le? (Mǝnia ka nê mala ɓwapǝnda na.) 6 Ko bǝti! Ɓǝ Ɓakuli ka mǝ’cauɓoarna na raka, palang sǝ nǝ̀ karǝ paki ɓanza ɓashi? 7 Sǝ ɓǝ ɓwa nǝ gandǝ na ɗǝm ama, “Palang sǝ Ɓakuli nǝ ɓasham ama mǝ nda mǝ’cauɓikea, yi mǝnana ɗwanyi na mǝsǝcau mem, lǝmndǝ mǝsǝcau male aban fana, sǝ kárì wi ɓoarɓwa mǝgule ka?” 8 Pǝla aɓea ɓwana tsǝka sǝm cau, ama sǝm na ama, “Lidǝmba ma’sǝm aɓa cauɓikea ka, nǝ ngga yinǝ mǝɓoarne!” Aɓwana mǝnana à na mǝnia yi cau ka, ɓoaro ɓǝa kashia wia ɓashi mǝnana karǝ aria ka.

Aɓwapǝnda kat ka amǝ cauɓikea na

9 Sǝm amǝ Yahudi ado ka, sǝm nǝ ne ɓamur rǝ sǝm ama sǝm kuti acili aɓwana le? Awo, sǝm kutia ɗang ko bǝti! Acemǝnana sǝm angngǝna dǝmba sǝm lǝmndǝna ama ɓwapǝnda kat, amǝ Yahudi andǝ aɓwana mǝnana amǝ Yahudi na raka, à nda aɓata rǝcanda mala cauɓikea. 10 Kǝla mǝnana Malǝmce na ka:

“Kǝɓwa pà kàm mǝ’cauɓoarna na ɗang, ko kǝɓwa mwashat pà kàm ɗang. 11 Kǝɓwa pà kàm nǝ́ sǝle ɗang, kǝɓwa pà kàm mwashat kǝ alta Ɓakuli ɗang. 12 Yia kat ka à pǝlǝni Ɓakuli nzǝmia; yia kat ka à uena ɓa. Kǝɓwa pà kàm mǝnana kǝ pak gir mǝɓoarne ka ɗang, ko ɓwa mwashat pà kàm ɗang.” 13 “Acau malea ka amǝɓike na, kǝla rǝmban mǝnana kǝ puro aɓa ɓembe mǝnana à gìrì raka. Lashia ka lumsǝ nǝ nyir.” “Barya mala n’yau kǝ surkio a kunia.” 14 “Kunia lumso nǝ suban andǝ nggaro-cau.” 15 * “À kǝ̀ kaura aban sukki nkila. 16 Kiɗiki andǝ bumkpǝmna ka nda atea a koya ban. 17 Yia ka à surǝ njar mala dorǝpwala ɗang.” 18 “À pà nǝ ɓangciu mala Ɓakuli ɗang, ko bǝti.” 19 Sǝm sǝlǝna ama gir mǝnana kat Nggurcau na ka, nda aban ne aɓwana mǝnana à nda aɓata Nggurcau ka, ace mǝnana ɓǝ ɓwa ɓǝ kǝa kum kun nacau ɗang, sǝ ɓanza kat ka à nǝ̀ yini a ɓadǝm ɓashi mala Ɓakuli. 20 Acemǝnana kǝɓwa pà kàm nǝ duk mǝ’cauɓoarna a ɓadǝm Ɓakuli acemǝnana bwal Nggurcau ka ɗang. Gir mǝnana Nggurcau paki ka, nda lǝmnda sǝm ulang do cauɓikea ma’sǝm.

Kǝrǝsti twalǝna atanni ma’sǝm

21 Sǝ a dyan ngga Ɓakuli lǝmndǝna njargula mǝnana aɓwana nǝ duk amǝɓoarne abani ni ka, pa ataria andǝ pak gir mǝnana Nggurcau bang ngga ɗang, kǝla mǝnana Nggurcau mala Musa andǝ amǝɓangna mala Ɓakuli nakun amuri ɗiɗyal ka. 22 À nǝ̀ pǝlǝ sǝm, sǝm nǝ̀ duk amǝ’cauɓoarna aban Ɓakuli ace paɓamuru sǝm aban Yesu Kǝrǝsti. Mǝnia ka anggo sǝ pa nǝ koyana mǝnana paɓamuri aban Kǝrǝsti ka, tàrban pa kàm ɗang. 23 Acemǝnana koyan ngga pangngǝna cauɓikea, sǝm kat ka sǝm gatti doɓoarɓwa mala Ɓakuli. 24 Kat andǝ amani ka, Ɓakuli nǝ ɓwamuru male, nyesǝ sǝm, sǝm duk amǝ’cauɓoarna. Yi ka pak mǝnia ka nǝ bu Kǝrǝsti Yesu, mǝnana akmur sǝm ngga. 25 Ɓakuli pa Yesu ɓǝ sukki nkile ace mǝnana nǝ mǝno ka, aɓwana nǝ kum twalban cauɓikea. Aɓwana mǝnana à paɓamuria aban Yesu ama pa yilǝmi, sukki nkile acea ka, Ɓakuli nyesǝnia amǝ’cauɓoarna na abani. Mǝnia yi nkila ɗara ka, lǝmndǝ ama Ɓakuli ka mǝ’cauɓoarna na, acemǝnana arǝ anza mǝnana ɗiɗyal ka, pak munyi nǝ aɓwana, tsǝk kir ce acauɓikea malea ɗang. 26 Pak mǝnia ka ace lǝmndǝ do mǝsǝcau male a nza mǝnia adyan ngga, ace mǝnana yi nǝ ɓamuri ka ɓǝ duk mǝ mǝsǝcau, sǝ nǝ tsǝk amǝ’cauɓikea kat mǝnana à pà ɓamuria aban Yesu ka, ɓǝa duk amǝ’cauɓoarnab abani.

27 Sǝm nǝ nggori ado ama sǝm pangngǝna kǝgir mǝnana tsǝa sǝ Ɓakuli ak sǝm ngga le? Awo, nggori pà kàm ɗang! Sǝ nda ace mana sǝ Ɓakuli ak sǝm? Nda acemǝnana sǝm kpata Nggurcau male ka le? Awo! Ɓakuli ak sǝm acemǝnana sǝm earni, sǝm pa ɓamur sǝm aban Kǝrǝsti ka. 28 Ace mani ka, sǝm duk amǝ’cauɓoarna aban Ɓakuli acemǝnana sǝm pa ɓamur sǝm ngga, pa ace bwal Nggurcau ɗang. 29 Sǝ a na raka, Ɓakuli ka, mala amǝ Yahudi na nǝmuria le? Yi ka Ɓakuli mala anzali na kat gbal re? E, nda acea. 30 Sǝ acemǝnana Ɓakuli na mwashat amur aɓwana kat ka, kǝ tsǝk aɓwe ɓǝa pǝlǝ amǝ’cauɓoarna, yi mana ɓǝa pa ɓamuria aban Kǝrǝsti ka, ko amǝ Yahudi, ko aɓwana mǝnana amǝ Yahudi na raka. 31 Sǝ acemǝnana sǝm darina arǝ pa ɓamuru aban Kǝrǝsti ka, lǝmndǝ ama Nggurcau ka sǝm turǝni le? Awo, ko bǝti! Aɓa mǝsǝcau ka, sǝm puna anzǝm Nggurcau.

4

Paɓamuru mala Ibǝrayim

1 Mana ado sǝm nǝ na amur Ibǝrayim, yi kà-aɓwana ma’sǝm aɓa ngguru? Mana girì na yi sǝla amur cau mala do mǝ’cauɓoarna aban Ɓakuli? 2 Ɓǝa aturo mǝɓoarne male, mǝnana pea ka nda tsǝa sǝ Ɓakuli é mǝcauɓoarna na ka, ɓǝ́ ndanǝ kǝgir mǝnana nǝ nggori ni ka. Sǝ Ibǝrayim ngga pà nǝ̀ gandǝ nggori aban Ɓakuli ɗang. 3 Acemǝnana Malǝmce bangga sǝm ama, “Ibǝrayim ngga ear nǝ Ɓakuli arǝ pacau mǝnana Ɓakuli pe wi ka, sǝ Ɓakuli é mǝ’cauɓoarna na ace paɓamuru male.”

4 Ɓǝ ɓwa pak turo sǝ à mbwe ka, ɓoro na à pe wi ka ɗang, tangnakusu turo male na kum ngga. 5 Sǝ Ɓakuli ka kǝ twal ɓwa ɓǝ do mǝ’cauɓoarna na, sǝ pa ce aturo male ɗang, nda ace paɓamuru male aban Ɓakuli, mǝnana twalikiyiban cauɓikea mala amǝ’cauɓikea ka. 6 Dauda nacau amur mǝnia gbal, mǝnana lǝmndǝ ulang tsǝkbu mǝnana amur ɓwa mana Ɓakuli nyeshi mǝ’cauɓoarna na ka, kat andǝ amani ama pak kǝ turo ace raka, ama:

7  “Tsǝkbu mala Ɓakuli na amur aɓwana mǝnana à twalǝnia wia ban amgbikiru malea, sǝ à esǝkinia wia acauɓikea malea ka. 8 E, tsǝkbu na amur ɓwa mǝnana acauɓikea male ka Mǝtalabangngo pa nǝ cia a bumi raka.” 9 Nggearǝ mǝnia yi tsǝkbu mǝnana Dauda nakiyi ce ka, nda ace amǝ Yahudi nǝmuria le ko nda gbal ace aɓwana mǝnana amǝ Yahudi na raka? Sǝm bang ama à gìlì aɓa Malǝmce ama, “Ibǝrayim ngga ear nǝ Ɓakuli, pà ɓamuri abani, sǝ Ɓakuli é mǝ’cauɓoarna na.” 10 Sǝ lang sǝ Ɓakuli é le? Ɓakuli é mǝ’cauɓoarna na anzǝm mǝnana à kasǝni wi ɓatec le, ko Ɓakuli é anggo sǝ ɓǝa yi kashi wi ɓate? Ɓakuli ak Ibǝrayim sǝ à yi kashi wi ɓate nǝ nzǝmo! 11 Yi kasǝ-ɓatau mǝnana à kashi Ibǝrayim ngga nda gir mǝnana lǝmndǝ ama nǝ paɓamuru male aban Ɓakuli ka, Ɓakuli earǝna angngǝni, ama yi ka mǝ’cauɓoarna na abani, sǝ à yi kashi wi ɓate. Ace mani ka, Ibǝrayim nda tar aɓwana kat mǝnana à pà ɓamuria aban Ɓakuli sǝ Ɓakuli kǝ ea amǝ’cauɓoarna na, kat andǝ amani ama à kashia wia ɓatea raka. 12 Sǝ Ibǝrayim ɗǝm ngga, nda tar aɓwana mǝnana à kashia wia ɓatea, yia mǝnana kasǝ-ɓatau na à kashia wia nǝmuri ka ɗang, yia gbal ka à twalkusǝ ulang paɓamuru mala Ibǝrayim, mǝnana ndani sǝ nǝ nzǝmo ka à yi kashi wi ɓate ka.

13 Mǝnana Ɓakuli ne Ibǝrayim andǝ amǝkè ama nǝ tsǝkia wia bu sǝ ɓanza kat nǝ duk malea ka, pa acemǝnana Ibǝrayim bwal Nggurcau mala Ɓakuli ka ɗang, nda acemǝnana ear nǝ Ɓakuli, guli ari ama nǝ pak gir mǝnana bang ngga, sǝ ace mǝno ka Ɓakuli é mǝcauɓoarna na. 14 Ɓǝ pàcau mala Ɓakuli ka nda ace aɓwana mǝnana à bwal Nggurcau male mana pe Musa ka, lǝmndǝ ama guli arǝ Ɓakuli ace mǝnana ɓǝ nyesǝ sǝm ɓǝ sǝm duk amǝ’cauɓoarna ka nda ɓà, sǝ guli ari gbal ace kum gir mǝnana pàcau ace ka nda ɓà. 15 Yàl Nggurcau kǝ nun bumlulla mala Ɓakuli amur aɓwana mǝnana à kǝ ɓariki ama à nǝ̀ bwali ka. Sǝ ɓǝ Ngggurcau pà kàm raka, yàl Nggurcau gbal ka, pà kàm ɗang!

16 Ace mani ka, nǝ́ guli arǝ Ɓakuli sǝ ɓwa nǝ kum gir mǝnana Ɓakuli pàcau ace ka. Ɓakuli pe anggo ace mǝnana ɓǝa sǝlǝ ama kàngkàng gir mǝnana pàcau ace ka nǝ ɓwamur aɓwana ni, yia aɓwana kat mǝnana amuna mala Ibǝrayim na ka. Mǝno yi ɓwamuru ka pa ace amǝ Yahudi mǝnana à kpakiyi ata Nggurcau ka nǝmuria ɗang, nda gbal ace aɓwana mǝnana à ear nǝ Ɓakuli, à guli ari kǝla mala Ibǝrayim ngga. Ibǝrayim ngga nda tar sǝm kat. 17 Kǝla mǝnana à gili aɓa Malǝmce ka, Ɓakuli ne wi ama, “Mim ngga ǝn tsǝngngǝno a dumǝna tarrû amur aɓwana arǝ anzali pas.” Mǝnia ka pa anggo, acemǝnana Ibǝrayim ear nǝ Ɓakuli mana kǝ loasǝ alú nǝ yilǝmu sǝ kǝ pusǝ agir mǝbǝshe aban mǝnana kǝgir pà kàm raka.

18 Kat andǝ amani ama kǝgir tsǝkɓalu pà kàm ama Ibǝrayim nǝ kum muna raka, yi ka lidǝmba nǝ tsǝkɓalu, eare ama nǝ duk tarrû amur aɓwana arǝ anzali pas, acemǝnana Ɓakuli bangngǝni wi ama, “Anggo sǝ lakki mala amǝkeo nǝ pa.” 19 Sǝ paɓamuru mala Ibǝrayim aban Ɓakuli ka, gati ɗang, kat andǝ mani ama lang apǝla male málá nǝ lumsǝ gbǝman mwashat ka, yi sǝni ka èna a ngguri, mǝnana à nǝ̀ twali ama yi ka lú na, sǝ ɗǝm ngga yi sǝn mami Saratu mana èna, sǝ gandǝ ɓǝli wi muna raka. 20 Pa eare mala Ibǝrayim nǝ gir mǝnana Ɓakuli na ama nǝ pe ka, dǝurǝ ɗang. Aɓa mǝsǝcau ka, paɓamuru male aban Ɓakuli lidǝmba nǝ rǝcanda, andǝ gusǝlǝ Ɓakuli. 21 Yi ka earǝna ni nǝ ɓabumi kat ama Ɓakuli nanǝ rǝcanda nǝ lumsǝ gir mǝnana bangngǝna ama nǝ pè ka. 22 Sǝ ace paɓamuru male yi Ibǝrayim ngga, “Ɓakuli twali mǝ’cauɓoarna na.” 23 Cau mǝno à bangnyi ama, “Ɓakuli twali mǝ’cauɓoarna na” ka, pa ace Ibǝrayim nǝmuri sǝ à gili ɗang. 24 Nda gbal ace sǝm mǝnana Ɓakuli nǝ ak sǝm kǝla amǝ’cauɓoarna, sǝm mǝnana sǝm pa ɓamur sǝm abani, yi ɓwa mana loasǝ Yesu Mǝtala sǝm a ɓembe ka. 25 À twali à pea aɓwana ɓǝà wal-luí ace acauɓikea ma’sǝm, sǝ à yi loashi nǝ yilǝmu ace mǝnana ɓǝà pǝlǝ sǝm ɓǝ sǝm duk amǝ’cauɓoarna aban Ɓakuli ka.

5

Guli arǝ Kǝrǝsti kǝ yinǝ dorǝpwala andǝ banɓoarnado

1 Acemǝnana ado ka sǝm kumǝna akban aban Ɓakuli ata cau mala paɓamuru ka, sǝm ndanǝ dorǝpwala a nre sǝm sǝnǝa Ɓakuli nǝ bu Mǝtala sǝm Yesu Kǝrǝsti. 2 Ndá àkǝ̀ ce guliaru ma’sǝm arǝ Kǝrǝsti sǝ yinǝ sǝm aɓa ɓwamuru mala Ɓakuli mǝnana ado sǝm do aɓali ka. Nda gir mǝnana tsǝa sǝm nggǝ nggori nǝ tsǝkɓalu mǝnana sǝm ndani mala kum nkambe aɓa gulo mala Ɓakuli ka. 3 Ban kǝ ɓoara sǝm gbal, yi mǝnana ɓǝ sǝm kuti aɓalǝ atanni ka, acemǝnana sǝm sǝlǝna ama tanni ka, nǝ yinà sǝm nǝ do gandǝru, 4 sǝ do gandǝru ka, kǝ yinǝ ɓealu mǝɓoarne, sǝ ɓealu mǝɓoarne kǝ tsǝa tsǝkɓalu ma’sǝm mala kum amsǝban kǝ dǝurǝ ɗang. 5 Sǝ mǝnia yi tsǝkɓalu ka, pà nǝ̀ tsǝa sǝm nǝ̀ nu kǝsǝkya ɗang, acemǝnana Ɓakuli pana sǝm ɓoro male, yi Bangngo Mǝfele, ɓǝ lumsǝ ɓabum sǝm nǝ earcearu male.

6 Mǝnana sǝm nda piu aɓa ɗwanyi rǝcanda sǝ sǝm pà nǝ ban auwa raka, Kǝrǝsti yi wú ace sǝm amǝcauɓikea, a pwari mǝnana Ɓakuli kani ka. 7 Ndanǝ kwano aban aɓwana pas mǝnana ɓwa nǝ wú ace mǝ’cauɓoarna ka, earka ɓwa nǝ gandǝ wú ace mǝpagbasha. 8 Sǝ Ɓakuli ka lǝmnda sǝm earcearu male ani: Mǝnana sǝm ndaka amǝcauɓikea piu ka, Kǝrǝsti yi wú ace sǝm.

9 Acemǝnana ado ka à angngǝna sǝm, sǝm dumǝna amǝ’cauɓoarna aban Ɓakuli nǝ nkila mala Kǝrǝsti ka, lǝmnda ama kàngkàng aɓa pe mǝnana kuti mǝno ka, sǝm nǝ kum awa a ɓabu bumlulla mala Ɓakuli nǝ bani! 10 Sǝ acemǝnana aɓa do ma’sǝm ɗiɗyal mǝnana sǝm ndaka aɓibura mala Ɓakuli ka, à yi gilǝki nre sǝm sǝnǝa Ɓakuli nǝ lú mala Muni ka, lǝmnda ama kàngkàng aɓa pe mǝnana kuti mǝno ka, sǝm nǝ kum auwa acemǝnana yi Muna mala Ɓakuli ka ndakam nǝ yilǝmu. 11 Sǝ mǝno na nǝmuri ɗang; sǝm nda aɓa banɓoarnado ace bǝsa dotaru ma’sǝm sǝnǝa Ɓakuli ace gir mǝnana pè nǝ bu Mǝtala sǝm Yesu Kǝrǝsti ka. Yi Kǝrǝsti ka nda ɓwa mǝnana pǝlǝ sǝm ado, sǝm dumǝna agyajam mala Ɓakuli ka.

Gir mǝnana gau Adamu andǝ Kǝrǝsti ka

12 Lang Adamu pangngǝna cauɓikea ka, kara cauɓikea kutio a ɓanza. Cauɓikea mala Adamu nǝ yinǝ lú, sǝ lú pǝla meshe amur koyan ngga, acemǝnana koyan ngga pangngǝna cauɓikea. 13 Kani ama à nǝ̀ pa Nggurcau ka, cauɓikea nakam ɗiɗyal a ɓanza. Sǝ duk cauɓikea ɗang, acemǝnana à malaká pa Nggurcau peatu mǝnana à nǝ̀ yàlì ka ɗang. 14 Kat andǝ amani ka, ɓwapǝnda kǝ wú, twal a nza mala Adamu yi bwal a nza mala Musa, kpapi andǝ nggǝrǝ aɓwana mǝnana cauɓikea malea ka yàl nzongcau na kǝla mǝnana Adamu pak ka raka, lú do amuria kat. Yi Adamu ka girlǝmnda na, kǝ lǝmndǝ Kǝrǝsti mǝnana nǝ ngga yiu peatu ka.

15 Sǝ cauɓikea mala Adamu andǝ ɓoro mala Ɓakuli ka, à nda ɗàng-ɗáng. Acemǝnana cauɓikea mala mǝnia yi ɓwa mwashat, yi Adamu ka, yine lú amur aɓwana pas. Sǝ ɓwamuru mala Ɓakuli ka gulo kuti mǝno kuko, anggo gbal sǝ ɓoro male mala twalban cauɓikea aban aɓwana pas pa, yi ɓoro mǝnana yiu nǝ bu mǝnia yi ɓwa mwashat, yi Yesu Kǝrǝsti ka. 16 Sǝ gir mǝnana ɓwamuru mala Ɓakuli pushi ka, ndá ɗàng andǝ gir mǝnana cauɓikea mala mǝnia yi ɓwa mwashat, pushi ka. Acemǝnana cauɓikea mala Adamu ka yinǝban aɓa kasǝ ɓashi-lú, sǝ ɓoro mala Ɓakuli ka kǝ wanǝ sǝm a kum kutio aban Ɓakuli, ko kat andǝ amǝnana ama sǝm kpa aɓalǝ acauɓikea pas ka. 17 Cauɓikea mala ɓwa mwashat, yi Adamu, tsǝa lú do amur aɓwana kat. Sǝ gir mǝnana kar mur mǝno ka, nda kum ɓwamuru mǝgule mala Ɓakuli andǝ pa ɓoro mala duk aɓwana amǝ’cauɓoarna nǝ bu ɓwa mwashat, yi Yesu Kǝrǝsti. Sǝ aɓwana mǝnana kat à kum mǝnia yi ɓwamuru andǝ ɓoro ka, à nǝ̀ duk amurǝma aɓa do malea nǝ bu Yesu Kǝrǝsti.

18 Ace mani ka, kǝla mǝnana cauɓikea mwashat mala Adamu yinǝ kasǝ ɓashi-lú amur aɓwana kat ka, anggo gbal sǝ turo cauɓoarna mwashat mala Kǝrǝsti kǝ yinǝ akban aban Ɓakuli andǝ yilǝmu ace aɓwana kat. 19 Sǝ kǝla mǝnana nǝ mgbikiru mala ɓwa mwashat ka, aɓwana pas pǝlǝ amǝ’cauɓikea ka, anggo gbal ata cau mala okiru mala ɓwa mwashat ka, aɓwana pas nǝ duk amǝ’cauɓoarna.

20 À pà Nggurcau mala Ɓakuli, ace mǝnana ɓǝa ɓwana sǝn lime andǝ gulo mala cauɓikea malea. Sǝ lang ɓwapǝnda came arǝ lidǝmba aɓa cauɓikea ka, ɓwamuru mala Ɓakuli kǝ gulo kǝ tur a dǝmba kǝrkǝr. 21 Mǝnia ka pa anggo ace mǝnana kǝla mana cauɓikea do amur ɓwapǝnda kat a njar mala lú ka, anggo gbal ɓǝ ɓwamuru mala Ɓakuli kǝ duk murǝm a njar mala pǝlǝ aɓwana ɓǝa kum akban abani, sǝ aɓa mǝno ka ɓǝa kum yilǝmu mǝnana pa nǝ mal raka, nǝ bu Yesu Kǝrǝsti Mǝtala sǝm.

6

Wuki cauɓikea andǝ do nǝ yilǝmu aɓa Yesu Kǝrǝsti

1 Mana ɗǝm sǝm nǝ na? Sǝm nǝ lidǝmba aɓa cauɓikea, ace mǝnana ɓǝ ɓwamuru ɓǝ gul ka le? 2 Awo! Pa anggo ɗang! Mǝnana sǝm angnga dǝmba sǝm wunî cauɓikea ka, lang sǝ sǝm nǝ lidǝmba nǝ do ɗǝm aɓali le? 3 Wu sǝlǝ mbak ama batisǝma mǝnana à paka sǝm aɓa Yesu Kǝrǝsti ka, lǝmndǝ ama sǝm dumǝna mwashat sǝnia, aɓa lú male? 4 Sǝm ngga, sǝm wú, sǝ à tsǝk sǝm a tuli sǝnǝa Kǝrǝsti nǝ batisǝma mǝnana à paka sǝm ngga ace mǝnana, ɓǝ do ama kǝla mǝnana Kǝrǝsti loapi ɓembe nǝ yilǝmu aɓa rǝcanda mala Ɓakuli Tárru ka, sǝm gbal ka, sǝm nǝ dukdo bǝsa yilǝmu.

5 Sǝ acemǝnana sǝm dumǝna mwashat sǝnǝa Kǝrǝsti aɓa lú male ka, sǝm gbal ka, sǝm nǝ loapi ɓembe nǝ yilǝmu kǝla yì. 6 Sǝm sǝlǝna ama, ɓeal sǝm mǝ’ě ka, à gbalini amur nggun-gangndi andǝa Kǝrǝsti, ace mǝnana ɓǝ rǝcanda mala kpata ɓamur rǝ sǝm mǝcauɓike ka ɓǝ kiɗikya, sǝ anggo ka ɓǝ sǝm ngga duk aguro aɓata cauɓikea ɗǝm ɗang. 7 Sǝ ɓwa mǝnana wuna andǝa Kǝrǝsti ka, à panzǝni, cauɓikea pa nǝ rǝcanda amuri ɗǝm ɗang.

8 Sǝ ɓǝ sǝm wuna sǝnǝa Kǝrǝsti ka, sǝm pana eare ama sǝm nǝ dum nǝ yilǝmu sǝnia, 9 acemǝnana sǝm sǝlǝna ama lo mala Kǝrǝsti a ɓembe ka, pa nǝ sǝn lú ɗǝm ɗang; lú pa nǝ rǝcanda amuri ɗǝm ɗang. 10 Lú male mǝnana wu ka, wuki cauɓikea kusǝ mwashat ɓǝrɓǝr, sǝ do male ka, dupi Ɓakuli.

11 Anggo gbal, wu sǝn ɓamur rǝwun ado, wu nda ka alú aban cauɓikea, sǝ aban Ɓakuli ka, wu ndanǝ yilǝmu aɓa Kǝrǝsti Yesu.

12 Wu kǝa eari cauɓikea ɓǝ do amur nggurǝ wun mǝnana kǝ̀ ká nǝ ká a lú ka, ɓǝ tsǝa wu kpata anpel male ɗang. 13 Wu kǝa pà abare nggurǝ wun aban cauɓikea ɓǝa duk agirturo mala ɓealɓikea ɗang. Akun mani ka, wu pe Ɓakuli rǝwun, kǝla aɓwana mǝnana à loasǝnia a lú à kumǝna yilǝmu ka; sǝ wu pà abare wun aban Ɓakuli ɓǝa duk agirturo ace turo cauɓoarna. 14 Cauɓikea ka pà nǝ̀ duk gbani amur wun ɗang, acemǝnana wu pa ɗǝm aɓata Nggurcau ɗang, wu nda aɓata ɓwamuru mala Ɓakuli.

Aguro mala cauɓoarna

15 Lang sǝ wu sǝni ado ɗe? Sǝm nǝ lidǝmba nǝ pak cauɓikea, acemǝnana sǝm pa ɗǝm nǝ do aɓata Nggurcau ɗang, sǝm nda aɓata ɓamuru mala Ɓakuli ka le? Awo, pà nǝ̀ pa anggo ɗang! 16 Wu sǝlǝ mbak ama, ɓwa mǝnana wu pa ɓamur wun, wu kǝ oki wi kǝla aguro ka, wu dumǝna aguro male, ko mala cauɓikea na, mǝnana nǝ kánǝ wun a lú, ko mala okiru mǝnana nǝ kánǝ wun a docauɓoarna ka? 17 Ɓǝ sǝm paki Ɓakuli yauwa ama, wun mǝnana ɗiɗyal, wu nda ka aguro mala cauɓikea ka, adyan ngga, wu kpana ata amǝsǝcau mala kanigir mala Ɓakuli nǝ ɓabum wun kat, yi kanigir mǝnana à pà wun ngga. 18 Adyan ngga, à panzǝna wun a bu cauɓikea, ado ka, wu dumǝna aguro mala cauɓoarna.

19 Ən bangga wun cau nǝ kanicau arǝ duk guro aɓa ngguru ata cau mala gattya mala ɗenyicau ma’wun aɓa ngguru arǝ bwalta agír mala bangngo. Kǝla mǝnana ɗiɗyal ka, wu pà rǝ wun aban paki agir mǝɓane, wu duk aguro mala paki agirɓana andǝ aturo ɓealɓikea ka, anggo gbal adyan ngga, wu nǝ pa ɓamur rǝ wun kat, wu dumǝna aguro mala cauɓoarna andǝ do mǝfele. 20 Mǝnana ɗiɗyal wu nda ka aguro mala cauɓikea ka, kǝgir oasǝ wun arǝ turo cauɓoarna ɗang. 21 Sǝ ya gir mǝɓoarne na wu kumo arǝ abaku mǝno aɓa paki amǝno yi agir mǝnana adyan ngga à dupa wun agir kǝsǝkya ka? Masǝlata agir mǝno ka, nda lú! 22 Sǝ ado ka, à panzǝkina wun a bu cauɓikea, wu dumǝna aguro mala Ɓakuli, gir mǝnana wu nǝ kum aɓali ka nda do mǝfele, sǝ masǝlate ka nda yilǝmu mǝnana málá male pà kàm raka. 23 Tangnakusǝ cauɓikea ka, lú na, sǝ ɓoro mala Ɓakuli ka, nda yilǝmu mǝnana málá male pà kàm raka, nǝ bu Kǝrǝsti Yesu Mǝtala sǝm.

7

Cau mǝnana Nggurcau mala Musa bangnga amur doɓala ka

1 Sǝ wun amǝ’eambam, wun mǝnana wu surǝ Nggurcau ka, wu sǝle mbak ama Nggurcau ka ndanǝ rǝcanda amur ɓwa ɓǝ ɓwe ka nda andǝa yilǝmu piu ka re? 2 Wu sǝni ani: à nê mala Nggurcau ka, mɓwama pa nǝ̀ nying buri ɗang, yi mana ɓǝ buri nanǝ yilǝmu ka. Sǝ ɓǝ buri wu ka, mɓwame purǝni mǝno yi Nggurcau mala doɓala ka. 3 Ace mani ka, ɓǝ mǝnia yi mɓwama puro al ɓe ɓwabura sǝ buri na nǝ mǝshi ka, nda aɓa pak cauɓikea nongnǝban a nza. Sǝ ɓǝ buri pak lú ka, mɓwame purǝni mǝno yi Nggurcau ka, nǝ gandǝ al ɓe ɓwabura, sǝ ɓǝ pa anggo ka, pa aɓa pak cauɓikea nongnǝban a nza ɗang.

4 Anggo gbal, wun amǝ’eambam, wun gbal ka wu wuni Nggurcau, acemǝnana wu nda aɓa nggurǝ Kǝrǝsti a lú male. Ado ka, wu nda ka amale, yi mǝnana loapi ɓembe ka, ace mǝnana ɓǝ sǝm dumnǝ ɓoaro aban Ɓakuli aɓa turo male. 5 Aɓa do ma’sǝm ɗiɗyal mǝnana nggurǝ sǝm na kǝ gingnǝ sǝm ngga, anpel mala cauɓikea mana Nggurcau loashia aɓa nyam sǝm ngga, à ndarǝ pak turo, sǝ ko man sǝm pak kat ka, mala ká lú na. 6 Sǝ adyan ngga, sǝm purǝni Nggurcau, acemǝnana sǝm wuna aban agir mǝnana ɗiɗyal à bwal sǝm a guro ka. Sǝm ado ka, sǝm nggǝ pak turo a njar mǝ’ě mala Nggurcau ɗǝm ɗang, turo ma’sǝm a dyan ngga, nda a njar mǝbǝshe mala Bangngo.

 

Nggurcau mala Ɓakuli kǝ lǝmndǝ turo cauɓikea ma’sǝm

7 Sǝ mana ado sǝm nǝ na? Nggearǝ Nggurcau ka, cauɓikea na le? Awo! Pa anggo ɗang! Ɓǝ̀ pà ace Nggurcau raka, ɓǝ́ pà mǝ surǝ cauɓikea ɗang. Ɓǝ́ pa mǝ nǝ sǝlǝ ce cauɓikea mala sham gir mala ɓwa ɗang, mǝnana ɓǝ Nggurcau bang ma ama, “Ka sham gir ɗang” raka. 8 Sǝ cauɓikea ka, pak turo nǝ mǝnia yi nzongcau ka, pǝla loasǝ ambalang mala shamgir ɗàng-ɗáng a ɓalam! Sǝ ɓǝ̀ pa ace cau mala nzongcau raka, ɓǝ́ cauɓikea ka lugir na. 9 Mǝnana ǝn malaká sǝlǝ ce nzongcau raka, mǝ ndanǝ yilǝmu; sǝ lang nzongcau yina ka, cauɓikea long nǝ yilǝmu, sǝ ǝn pǝlǝ lú. 10 Nggearǝ nzongcau mǝnana ɓoaro ɓǝ lǝmndam njargula yilǝmu ka, pǝla yinam nǝ lú.

11 Cauɓikea kara kum njar ata nzongcau, pǝla swarkiam, sǝ pakturo nǝ nzongcau, wal luim.

12 Ace mani ka, Nggurcau ka mǝfele na, sǝ nzongcau ka mǝfele na, sǝ nda pepè, sǝ mǝɓoarne na. 13 Ado ka, gir mǝɓoarne yinam nǝ lú le? Awo, pa anggo ɗang! Kǝ cauɓikea na pak turo nǝ gir mǝɓoarne, sǝ yinam nǝ lú, ace mǝnana cauɓikea ka, ɓǝa suri ama cauɓikea na. Sǝ ata cau mala nzongcau ka, cauɓikea nǝ lǝmndǝ ɓike male kǝrkǝr.

14 Sǝm sǝlǝna ama Nggurcau ka, gir mala Bangngo na, sǝ mim ngga mǝ nda ɓwa aɓa ngguru, guro aɓata cauɓikea. 15 Ən bwalta agir mǝnana ǝn paki ka ɗang, acemǝnana gir mǝnana ǝn earkiyi ce pe ka nda ǝn pakkiyi ka ɗang. Sǝ gir mǝnana ǝn ɓinǝce ka, nda ǝn pakkiyi ka. 16 Sǝ ɓǝ ǝn nggǝ pak gir mǝnana ǝn earkiyi ce pe raka, ǝn earǝna ama Nggurcau ka, ndanǝ ɓoaro. 17 Ace mani ka, mǝ nda mǝnana ɗǝm ǝn pakkiyi mǝnia yi gir mǝɓane ka ɗang, kǝ cauɓikea mǝnana do a ɓalam ngga, nda pakkiyi ka. 18 Ən sǝlǝna nǝma kǝgir mǝɓoarne pa a ɓalam, aɓa ngguram ɗang. Ən nggǝ earce pak gir mǝnana pepè ka, sǝ ǝn gandǝ pe ɗang. 19 Ən gandǝ pak mǝɓoarne mǝnana ɓoaro ɓǝ ǝn pe ka ɗang, kǝ mǝɓike mǝnana ǝn earkiyi ce pe raka, nda ǝn nggǝ pak ka. 20 Sǝ ɓǝ ǝn nggǝ pak gir mǝnana ǝn earkiyi ce pe raka, mǝnia ka lǝmndǝ ama, mǝ nda ɗǝm ǝn pakkiyi mǝnia yi gir ka ɗang, kǝ cauɓikea mǝnana do a ɓalam ngga nda pakkiyi girì ka.

21 Anggo sǝ yi dupam, mǝnana ɓǝ ǝn earce nǝma mǝ nǝ pak mǝɓoarne ka, ǝn gandǝ pe ɗang, kara ǝn kum ɓamurǝam aban pak mǝɓike. 22 Aɓa yilǝmem ngga ban kǝ ɓoaram arǝ Nggurcau mala Ɓakuli. 23 Sǝ ama ǝn nggǝ sǝn ɓe kǝ rǝcanda a ɓalam aban muno arǝ ɓabumam, kǝ ciem mǝ duk guro aɓata nggurcau mala cauɓikea mǝnana do a ɓalam ngga. 24 Ya ulang dotanni nda mem! Yana nǝ amsam aɓa mǝnia yi ngguru mǝnana kǝ ká nǝ mim a lú ka le? 25 Sǝm paki Ɓakuli yauwa, ace amsǝban mǝnana ndakam nǝ bu Yesu Kǝrǝsti, Mǝtala sǝm ngga!

Mǝno ka nda gir mǝnana ado mǝ nda ɓali ka: a ɓabumam ngga, ǝn earǝnace kpata Nggurcau mala Ɓakuli, sǝ nǝ ngguram ngga, mǝ nda guro mala turo cauɓikea.

8

Do ɓa Bangngo

1 Adyan ngga ɓashi pà kàm ɗǝm amur aɓwana mǝnana à nda aɓa Kǝrǝsti Yesu ka ɗang. 2 Acemǝnana, rǝcanda mala Bangngo mǝnana yina sǝm nǝ yilǝmu aɓa Kǝrǝsti Yesu ka, panzǝkina sǝm a bu rǝcanda mala cauɓikea andǝ lú. 3 Gir mǝnana Nggurcau mala Musa gandǝ pe raka, ata cau mala gattya mala nggurǝ ɓwapǝnda mǝcauɓike ka, Ɓakuli yi pe. Yi tasǝ Muni male ɓǝ yiu aɓa ngguru mǝnana nda kǝla nggurǝ ɓwapǝnda mǝcauɓike ka, ɓǝ yi pa ɓamuri kǝla gir-nkila ace twal cauɓikea. Aɓa pe mǝnia anggo ka Ɓakuli yinǝ kasǝ-ɓashi amur cauɓikea, kiɗiki rǝcanda male aɓa mǝno yi ngguru mala ɓwapǝnda ka. 4 Ɓakuli pe anggo ace mǝnana nzongcau mala Nggurcau male, arǝ anjari kat ka, ɓǝ kum lumso cikcik aɓalǝ sǝm, sǝm mǝnana do ma’sǝm ngga ngguru na sǝm ginggiyi ate ka ɗang, Bangngo na ka.

5 Aɓwana mǝnana do malea ka, à kǝ kpata gir kǝla mǝnana ngguru kǝ banggia wia ka, ɓabumia nǝ̀ pa arǝ gir mǝnana nggurǝ earkiyi ce ka; sǝ aɓwana mǝnana do malea ka Bangngo na kǝ gingnia ka, ɓabumia nǝ̀ pa arǝ gir mǝnana Bangngo earkiyi ce ka. 6 Ɓǝ ngguru na kǝ gingnǝ ɗenyicau ma’wun, masǝlate ka lú na. Sǝ ɓǝ Bangngo na kǝ gingnǝ ɗenyicau ma’wun, masǝlate ka yilǝmu na andǝ dorǝpwala. 7 Lǝmnda ama aɓwana mǝnana à dum nǝ ɓabum mala kpata ngguru ka, à dumǝna aɓibura mala Ɓakuli; yia ka à kǝ kpata nzongcau mala Ɓakuli ɗang, sǝ aɓa mǝsǝcau ka, à pà nǝ̀ gandǝ kpate ɗang. 8 Aɓwana mǝnana ngguru na kǝ gingnia ka, à pà nǝ̀ gandǝ pwasǝbum Ɓakuli ɗang.

9 Sǝ wun ngga, ngguru mala cauɓikea na ginggi nǝ wun ngga ɗang, Bangngo na, ɓǝ Bangngo mala Ɓakuli na dukiyi a ɓabum wun ngga. Ɓwa mǝnana pà nǝ́ Bangngo mala Kǝrǝsti a ɓabumi raka, ɓwe ka màlà Kǝrǝsti na ɗang. 10 Sǝ ɓǝ Kǝrǝsti na a ɓabum wun, kat andǝ amani ama nggurǝ wun ngga lú na ata cau mala cauɓikea ka, Bangngo kǝ tsǝa ɓǝ wu dum nǝ yilǝmu, acemǝnana à gilikina nre wun wunǝa Ɓakuli. 11 Ɓǝ Bangngo mala Ɓakuli mǝnana loasǝ Yesu a ɓembe nǝ yilǝmu, nda aban do a ɓabum wun ngga, yi Ɓakuli mǝnana loasǝ Kǝrǝsti a ɓembe nǝ yilǝmu ka, nǝ pe nggurǝ wun mǝnana kǝ̀ ká nǝ ká a lú ka yilǝmu, nǝ bu Bangngo male mǝnana dukiyi a ɓabum wun ngga.

12 Ace mani ka, wun amǝ’eambam, tangna na amur sǝm, sǝ tangne ka nda mǝnana ama ɓǝ sǝm ngga eare sǝm nǝ̀ nggǝ kpata gir kǝla mǝnana ngguru earkiyi ce ka ɗang. 13 Ɓǝ wu kǝ dukdo kpata nê mala ngguru ka, wu nǝ wú. Sǝ ama aɓa rǝcanda mala Bangngo, wu tamsǝ pakia aturo cauɓikea mala ngguru, ɓǝa wu mak ka, wu nǝ dum nǝ yilǝmu. 14 Aɓwana mǝnana Bangngo mala Ɓakuli kǝ gingnia ka, amuna mala Ɓakuli na. 15 Bangngo mǝnana à pa wun ngga, nda mǝnana nǝ̀ tsǝk wun a guro aban ká do ɓangciu ɗǝm ngga ɗang. Bangngo mala nyesǝ wun ɓǝ wu duk amuna mala Ɓakuli na. Sǝ nǝ rǝcanda mala Bangngo ka, ko yan ata sǝm ngga nǝ ɓua aban Ɓakuli, nǝ ne wi ama, “Da, a nda Da!” 16 Bangngo mala Ɓakuli nǝ ɓamuri ka, kǝ bangga sǝm a ɓabum sǝm ama sǝm nda ka amuna mala Ɓakuli. 17 Sǝ acemǝnana sǝm nda ka amuna male ka, sǝm nǝ kum bani ma’sǝm mala liɓala male, mǝnana ci ace aɓwana male ka. Ɗǝm ngga, sǝm nǝ kum sǝnǝa Yesu, gir mǝnana kat Ɓakuli ci ace ka. Ɓǝ kangkang sǝm nu tanni ata Kǝrǝsti ulang mǝnana nu ka, sǝm nǝ kum gbal aɓa male yi gulo.

Gulo mǝnana nǝ yiu ka

18 Ən nggǝ sǝni ka, atanni mǝno sǝm nggǝ nu ado ka, à kara à nǝ̀ karǝkia arǝ gulo mǝnana à nǝ̀ ngga lǝmnda sǝmi nǝ nzǝmo ka ɗang. 19 Agirbunda mǝnana Ɓakuli pushia ka, à nda rǝ kúndo, nǝ̀ rǝɓǝla, arǝ pwari mǝno Ɓakuli nǝ̀ lǝmndǝna amuna male amǝɓafoe ni ka. 20 Girbunda kat kum ɓamuri a ɓata do ɗwanyi kum-lumso mala kane male, kǝ pǝlǝki nǝ ɓali ɓà. Sǝ mǝnia ka pà acemǝnana eare male na ka ɗang, pě mala ɓwa mǝnana ci aɓali ka nda. Kat andǝ amani ka, tsǝkɓalu na kam 21 ama ɓanza nǝ ɓamuri ka, nǝ ngga kum amsǝban a bu kurban mala kiɗiki male, sǝ à nǝ̀ yiu ni aɓa kum-ɓamuru mǝɓoarɓwe mala amuna mala Ɓakuli.

22 Sǝm sǝlǝna ama agir mǝnana à pushia a ɓanza kat ka, à nda ban ingge, kǝla mɓwama mǝnana nda aɓa kwanban mala gbashi ka, ba yalung. 23 Sǝ yìa agir ka, à nda mǝnana nǝmuria à kǝ inggi ka ɗang; nggearǝ sǝm gbal ka sǝm nggǝ ingge, yi sǝm mǝnana sǝm kumǝna Bangngo Mǝfele mǝnana ndà mǝdǝmbe mala aɓoro mǝnana Ɓakuli nǝ pa sǝm ngga. Ɗǝm ngga sǝm nggǝ tsǝk mǝsu nǝ rǝɓǝla aban kundǝ pwari mǝnana Ɓakuli nǝ̀ pa sǝm bani ma’sǝm mala kum lumso kǝla amuna male ni, sǝ nǝ panzǝ nggurǝ sǝm a bu cauɓikea andǝ tanni andǝ lú ka.

24 À kǝ̀ aɓa mǝnia yi tsǝkɓalu sǝ sǝm kum auwa. Sǝ ama tsǝkɓalu mǝnana ado à nǝ̀ gandǝ sǝni nǝ mǝsu ka, à pà nǝ̀ na ama tsǝkɓalu na ɗang. Lang sǝ ɓwa nǝ tsǝkɓali ado arǝ gir mǝnana ndani a bui kǝ sǝni ka? 25 Sǝ ɓǝ sǝm ndanǝ tsǝkɓalu arǝ gir mǝnana ado sǝm pa ni peatu, sǝm sǝni raka, sǝm nǝ kundǝ gìrî nǝ domunyi.

26 Anggo gbal, Bangngo ka kǝ bwala sǝm nggam aɓa gatti ma’sǝm. Acemǝnana sǝm surǝ lang sǝ sǝm nǝ pak hiwi, kǝla mǝnana ɓoaro ɓǝ sǝm pak ka ɗang, sǝ ama Bangngo mala Ɓakuli nǝ nggeari ka kǝ pak hiwi ace sǝm, nǝ ingge mǝnana à pà nǝ̀ gandǝ cie aɓa cau raka. 27 Sǝ Ɓakuli mǝnana sǝnggiyi ɓabum ngga, surǝna rǝ ɗenyicau mala Bangngo. Acemǝnana Bangngo kǝ zǝmba ace aɓwana mala Ɓakuli, amur gir mǝnana ne mala Ɓakuli na ka.

Sǝm kuti amǝ limurǝm

28 Sǝ sǝm sǝlǝna ama Ɓakuli kǝ tsǝk agir kat ɓǝa pang nǝ ɓoaro, ace lidǝmba mala aɓwana mǝnana à kǝ earce ka, aɓwana male mǝnana tunia ace kpata kane male ka. 29 Aɓwana mǝnana Ɓakuli angnga dǝmba surǝnia ka, nda gbal tària ɓǝa do kǝla Muni, ace mǝnana ɓǝ Muni duk muna-dǝmba aɓalǝ amǝ’eambi mǝnana pas ka. 30 Sǝ aɓwana mǝnana Ɓakuli tària ka, à nda ka amǝnana gbal tunia ka, sǝ aɓwana mǝnana tunia ka, angngǝnia, à dumǝna aɓwana amǝɓoarne abani, sǝ aɓwana mǝnana angngǝnia ka, à nda gbal yinia aɓa kum gulo male ka.

Earcearu mala Ɓakuli

31 Sǝ amana ado sǝm nǝ na, amur amǝnia yi agir ka? Ɓǝ Ɓakuli ka nda ata sǝm ngga, yana nǝ lo arǝ sǝm? 32 Ɓakuli ka girban nǝ Muni ɗang, pa Muni ace sǝm kat! Sǝ ɓǝ pa Muni ace sǝm ngga, pa nǝ gandǝ pa sǝm ɓoro nǝ agir gbal kat re? 33 Yana ɓwe na nǝ wuli aɓwana mǝnana Ɓakuli tària ka? Kǝ ɓwa pà kàm ɗang! Acemǝnana Ɓakuli nǝ́ ɓamuri nǝ̀ cia sǝ à duk amǝ’cauɓoarna! 34 Yana ɓwe na ado kasǝkiyi ɓashi amur sǝm? Yesu Kǝrǝsti na le, yi ɓwa mǝnana yi wú, sǝ lo nǝ yilǝmu, do a bu-mǝli mala Ɓakuli, kǝ zǝmba ace sǝm ngga! 35 Sǝ, yana nǝ gau sǝm sǝnǝa earcearu mala Kǝrǝsti? Tanni na nǝ tsǝk ka le, ko do mǝkwane, ko pàtanni, ko nzala na, ko tǝ̀r na, ko kum ɓamuru aɓa ká mǝɓane na, ko a na raka, lú na le? 36 Kǝla mǝnana Malǝmce na ka,

“Nda acèo, we Mǝtalabangngo sǝ sǝm nggǝ sǝn tanni, a koya pwari ka, mǝnana nǝ kanǝban a lú ka. Sǝm ado ka sǝm nda kǝla anzur mǝnana à nǝ̀ ngga pwanggi myalea ka.”

37 Awo! Aɓalǝ amǝnia yi agir kat ka sǝm kuti amǝ limurǝm, nǝ bu Kǝrǝsti mǝnana earce sǝm ngga! 38 Ən earǝna nǝ ɓabumam ama kǝgir pà nǝ̀ gau sǝm sǝnǝa earcearu mala Ɓakuli ɗang: ko lu na, ko auwa, ko amǝturonjar, ko akukwar, ko agir mǝnana à kǝ kumban a nza man, ko a nza mǝno nǝ yiu ka, ko ɓǝ ya rǝcanda na ni ka, 39 ko agir mǝnana a kuli, andǝ amǝnana ata nzali ka; kǝgir pà kàm aɓa ɓanza man, mǝnana nǝ gandǝ gau sǝm sǝnǝa earcearu mala Ɓakuli, mana aɓa Kǝrǝsti Yesu Mǝtala sǝm ngga ɗang.

9

Ɓakuli andǝ aɓwana male

1 Mim ngga mǝsǝcau na ǝn nggǝ na aɓa Kǝrǝsti ka; giu-ɓabumam mǝnana Bangngo Mǝfele na ginggiyi ni ka kǝ lǝmndam ama kàngkàng nyir na ǝn nakiyi ka ɗang ɓǝn na wun nǝma 2 mǝ ndanǝ bumkiɗikea kǝrkǝr andǝ pi mala ɓabum koya pwari 3 ace aɓwana mem, amǝ’eambam ngga. Ən earǝna ɓǝa suem, ko ɓǝa gau sǝm sǝnǝa Kǝrǝsti, ɓǝ mǝno ka nǝ̀ kánia ɓǝa kum amsǝban ngga. 4 Yia ka à ndaka amǝ’kau mala Isǝrayila; Ɓakuli tárìa ɓǝa duk amuna male; Ɓakuli lǝmndǝ gulo male kǝla Ɓakuli abania. Kurcau andia, sǝ pea wia Nggurcau male. Pea wia peri mala ɓa-ndamǝgule andǝ apàcau male. 5 A Ibǝrayim, andǝ Yakupu, andǝ Ishaku ka à ndaka keà mǝnana nǝ bania sǝ tau ɓǝlban mala Kǝrǝsti pur ka. Ɓwangsǝban mǝnana málá male pà kàm raka ɓǝa pè Ɓakuli mǝnana nda amur aɓwana kat ka! Amin.

6 Ado ka mǝ nda rǝ na ama Ɓakuli ka gandǝ lumsǝ pàcau male aban Isǝrayila ɗang le? Awo pa anggo ɗang, acemǝnana aɓwana na kat mana tea pur nǝ Isǝrayila, sǝ à nda ka ɓwana mala Ɓakuli ka ɗang! 7 Sǝ dǝm ngga aɓwana na kat mǝnana tea pur nǝ Ibǝrayim ngga, sǝ à ndaka amuna mala Ɓakuli ka ɗang. Ɓakuli ka bangngǝni Ibǝrayim ama, “Aɓa Ishaku sǝ amǝkeo mǝnana ǝn po cau acea ka à nǝ̀ puro.” 8 Mǝnia ka lǝmndǝ ama amuna mǝnana à ɓǝlia aɓa ngguru a tau mala Ibǝrayim ngga, à nda mǝnana à nda ka muna mala Ɓakuli ka ɗang, kǝ amuna mǝnana à ɓǝlia ata cau mala kurcau mala Ɓakuli ka, à nda ka mǝnana à suria kǝla amǝ’kau mala Ibǝrayim ngga. 9 Ani sǝ Ɓakuli bang pàcau male aban Ibǝrayim: “Pǝla mǝnia nǝ yia kar ka, mǝ nǝ nyare, sǝ Saratu nǝ ɓǝl muna-ɓwabura.”

10 Sǝ mǝno na nǝmuri ɗang, Rabeka gbal ka ɓǝl amuna-burana ɓari. Sǝ amǝno yi amuna ka tária mwashat, yi kà sǝm Ishaku. 11-12 Sǝ lang Rabeka málá nǝ̀ gbashi amǝnia yi apasa ka, Ɓakuli ne wi ama, “Munadǝmba nǝ do aɓata ɓwamǝkyauwe.” Ɓakuli bang mǝnia ka kaniama à nǝ̀ ɓǝlia, sǝ ɗǝm ngga bangnyi à pà mǝnana à malaka surǝ mǝɓoarne ko mǝɓane raka. Mǝnia ka lǝmnda ama Ɓakuli ka nda rǝ pak gir mǝnana ɓabumi kani nǝ pak ka twal a tite; pa ace ɓe kǝ gir mǝnana amuna mǝnia pak ka ɗang, nda ace gir mǝnana Ɓakuli earce sǝ twal ka. 13 Kǝla mǝnana Malǝmce na ka ama, “Yakupu ka ǝn earǝna ce, sǝ Isǝwa ka ǝn ɓinǝna mǝshi.”

14 Sǝ aman sǝ sǝm nǝ bangnga amur mǝno? Ɓakuli ka pak mǝɓike le? Awo! Pak mǝɓike ɗang! 15 Acemǝnana Ɓakuli banggi Musa ama, “Mim ngga, mǝ nǝ lǝmndǝ ɓwamuru aban ɓwa mǝnana mǝ nǝ lǝmndi wi ɓwamuru ka. Sǝ mǝ nǝ sǝn mǝsǝswatǝr mala ɓwa mǝnana kat mǝ nǝ sǝn mǝsǝswatǝr male ka.”

16 Ace mani ka, Ɓakuli na twalkiyi ɓwa mǝnana nǝ lǝmndi wi ɓwamuru ka. Sǝ twalban male ka kǝ kpata gir mǝnana aɓwana earce ko à ɓariki pe ka ɗang. 17 Aɓa Malǝmce ka, Ɓakuli banggi Murǝm mala amǝ Masar ama, “Ən dumso a bunomurǝm, ace lǝmndǝ rǝcanda mem a ɓalo, sǝ ɓanza kat ɓǝ ok ce lullam.” 18 Ace mani ka, Ɓakuli kǝ lǝmndǝ ɓamuru male amur ko yana eare nǝ lǝmndi ɓwamuru ka, sǝ kǝ candǝ mur ɓwa mǝnana eare nǝ candi muri ka.

Bumlulla andǝ ɓwamuru mala Ɓakuli

19 Sǝ anggo ka, wun nǝ gandǝ nam ama, “Ɓǝ ko man kat ka nda a bu Ɓakuli sǝ yì na ginggini ka, ace mana sǝ kǝ sǝn mǝɓane arǝ acauɓikea ma’sǝm piu le? Yana ɓwe na ɗe nǝ gandǝ ɓinǝ kane male?” 20 Sǝ a nda yana, we ɓwapǝnda, yi mǝnana a wu nǝ pǝlǝcau a kun Ɓakuli ka? “Gir mǝnana à pè nǝ́ pa ka, nǝ̀ gandǝ banggi ɓwa mǝnana pè ka ama, ‘Palang sǝ a pem a ni?’ le?” 21 Mǝɓaki ankwaring ngga, pà nǝ́ rǝcanda mǝnana nǝ̀ ɓak nkwaring ace turo mǝgule andǝ nkwaring ace ko ya turo nani ka, aɓa ɗuro-dǝɓang mǝmwashati re?

22 Ɓǝ̀ Ɓakuli earce ka, nǝ̀ gandǝ ukki bumlulla malea amur aɓwana, sǝ nǝ lǝmndǝ rǝcanda male. Sǝ ama yi ka pak munyi nǝ gandǝru nǝ aɓwana mǝnana ɓoaro ɓǝ lǝmndia wia bumlulla ka, yia mǝnana à dupi ká kiɗiki ka, 23 ace mǝnana ɓǝ lǝmndǝ kume mǝnana ndakam aɓa gulo male ace aɓwana mǝnana ɓwamuria ka, yia amǝnana akdǝmba tàriá ɓǝa kum nkambe mala ɓoarɓwa male ka. 24 Sǝm nda ka mǝno yi aɓwana tàr sǝm ace ɓwamuru ka, sǝm mǝnana tunǝ sǝm aɓalǝ amǝ Yahudi, sǝ aɓalǝ aɓwana mala acili anzali gbal ka. 25 Kǝla mǝnana bangnga aɓa Malǝmce mala Hosiya ama:

“Aɓwana mǝnana amem ma raka, mǝ nǝ tunia ama, ‘Aɓwana mem.’Aɓwana mǝnana ǝn earcea raka, Mǝ nǝ tunia ama, ‘Aɓwana mem mǝnana ǝn earkiyi acea raka.’ ”

26 Ɗǝm ngga, “Aban mǝnana à banggia wia ɗiɗyal ama, ‘Wun ngga, wu ndaka aɓwana mem raka,’ àkǝ̀ bani sǝ à nǝ̀ tunia ama, ‘Amuna mala Ɓakuli mǝ’yilǝmui.’ ” 27 Ishaya ɓua ace amǝ Isǝrayila ama: “Ko ɓǝà na ama laki mala amǝ Isǝrayila ka nda kǝla sala akun nggǝeamur ka, kǝ bǝti aɓalia nda à nǝ̀ kum auwa ka.

28 Ɓakuli ka nǝ yia sulǝ ɓashi male mǝnana kasǝni ka pupup amur ɓanza. Bani pà nǝ̀ sau ɗang, nǝ yia pe tsuktsuk.” 29 Kǝla mǝnana Ishaya angnga dǝmba bangna ka ama:

“Ɓǝ Mǝtalabangngo mǝnana Kar múr gulo kat nyingma sǝm amǝkau raka, ɓǝ́ sǝm dumǝna kǝla amǝ Sodom, ɓǝ́ sǝm pǝlǝna kǝla amǝ Gomora.”

Ɓinǝ ear nǝ cau mala Isǝrayila arǝ Cau Amsǝban

30 Sǝ aman sǝ sǝm bangnga? Aɓwana mala acili anzali mǝnana à kǝ kpata Nggurcau mala Ɓakuli raka, Ɓakuli nyesǝnia à pǝlǝna amǝ’cauɓoarna abani. Sǝ mǝnia ka nda ata cau mala guliaru malea arǝ Kǝrǝsti. 31 Sǝ amǝ Isǝrayila, mǝnana à ɓariki kǝrkǝr à nǝ̀ kpata Nggurcau mǝnana ɓǝ́ nǝ̀ kánia aɓa kum do cauɓoarna aban Ɓakuli ka, ko à kumi ɗang. 32 Palang ado sǝ à gandǝ kume ɗang? À gandǝ kume ɗang acemǝnana à kpate aɓa guli arǝ Ɓakuli ɗang, yia ka à guli amur ɓariki malea arǝ agir mǝnana à pea ka. Nda gir mǝnana tsǝa sǝ à annda amur “Tali annda” ka. 33 Kǝla mǝnana à gili aɓa Malǝmce ka ama:

“Sǝni, mǝ ndya ǝn nggǝ tsǝk muna-tali a Siyona, mǝnana nǝ tsǝk aɓwana à nǝ̀ anndǝ ka, andǝ nggea-tali mǝnana nǝ cia à nǝ̀ kpa ka. Sǝ ama ɓwa mǝnana é guliari ka, pà nǝ̀ kum kǝsǝkya ɗang.”

10

1 Wun amǝ’eambam, ɓabumam andǝ zǝmba mem aban Ɓakuli ka, nda ace amǝ Isǝrayila ɓǝa kum auwa. 2 Mǝ nda rǝ nakunia aɓa mǝsǝcau ama yia ka à ndanǝ bumpina arǝ kpata Ɓakuli, sǝ bumpina malea ka, pa aɓa sǝle ɗang. 3 Acemǝnana yia ka à bwalta njargula mǝnana Ɓakuli akiyina aɓwana ni ɓǝa duk amǝ cauɓoarna abani ka ɗang, sǝ dǝm ngga à kutia kwakita malea yi njar mala kum akban aban Ɓakuli, nǝ ɓariki malea arǝ bwal Nggurcau. Ace mani ka, à pa ɓamuria arǝ njar mala Ɓakuli mǝnana kǝ pǝlǝna aɓwana ni ɓǝa duk amǝ’cauɓoarna ka ɗang. 4 Kǝrǝsti ka yi malǝna turo mala nê mǝnana Ɓakuli pà Nggurcau ace ka. Ace mǝno ka aɓwana kat mǝnana à ear ni à paɓamuria abani ka, à nyesǝnia amǝ’cauɓoarna na aban Ɓakuli.

5 Amur do mǝcauɓoarna mǝnana à kumnggiyi nǝ bwal Nggurcau ka, Musa gilǝ ama, “Ɓwa mǝnana kat kpata Nggurcau lumsǝ agir mǝnana kat nzongcau male na ka, nda nǝ̀ kum yilǝmu ka.” 6 Sǝ do mǝcauɓoarna mǝnana à kumnggiyi nǝ guli arǝ Kǝrǝsti ka, bangnga ama: “Ce a na a ɓabumo ama, ‘Yana nǝ eau a kuli?’ “(ace mǝnana nǝ ngga sulǝ Kǝrǝsti a nzali ka) 7 ko ana raka “ ‘Yana nǝ sulǝ a tanzali?’* “ (ace mǝnana nǝ ngga loasǝ Kǝrǝsti a ɓembe ka) ɗang. 8 Malǝmce ka bangnga ama: “Cau mala Ɓakuli ka nda abano tù, nda a mburkuno, sǝ nda a ɓabumo.” Sǝ mǝno yi cau ka nda cau mala guli arǝ Kǝrǝsti, mǝnana sǝm nggǝ ham ni ka. 9 Ɓǝ̀ a wu nǝ̀ na nǝ kuno ama, “Yesu ka Mǝtalabangngo na,” sǝ a nǝ̀ earni nǝ mǝsǝcau a ɓabumo ama Ɓakuli loashi a ɓembe ka, a nǝ́ kum auwa. 10 Acemǝnana nǝ ɓabum sǝ ɓwa nǝ̀ eare nǝ̀ pà ɓamuri aban Kǝrǝsti, sǝ aɓa pě anggo ka Ɓakuli angngǝni mǝcauɓoarna na; sǝ ɗǝm ngga nǝ kûn sǝ ɓwa nǝ̀ bang paɓamuru male aban Kǝrǝsti aɓa dǝmba aɓwana, sǝ aɓa pě anggo ka kumǝna amsǝban. 11 Kǝla mǝnana Malǝmce na ka, “Ɓwa mǝnana kat paɓamuri abani ka, pa nǝ nu kǝsǝkya ɗang.” 12 Aɓa mǝnia ka kǝgir gakita ɓwa Yahudi andǝ ɓwa mǝnana ɓwa Yahudi na raka ɗang. Yia kat ka, à ndanǝ Mǝtalabangngo mwashat mǝnana nda Mǝtalabangngo amur aɓwana kat, sǝ atsǝkbu male mǝnana nyangsang ngga kǝ soapia aɓwana mǝnana kat à kǝ wanǝ ɓua malea abani ka. 13 Kǝla mǝnana Malǝmce bang ngga: “Ɓwa mǝnana kat kǝ ɓua aban Mǝtalabangngo kǝ tunǝ lulli ka, nǝ kum amsǝban.”

14 Sǝ ama lang sǝ à nǝ̀ tuni ɓǝ amshia, yi mǝnana ɓǝa pa ɓamuria abani raka? Sǝ lang sǝ à nǝ̀ paɓamuria abani, yi mǝnana à malaka ok kǝcau amuri raka? Sǝ lang sǝ à nǝ̀ ok cau amuri, yi mǝnana kǝɓwa hambia wia ce raka? 15 Sǝ lang sǝ aɓwana nǝ̀ hamnǝ cau, yi mǝnana Ɓakuli turia raka? Kǝla mǝnana à gili ka: “Yiu mala aɓwana mǝnana à kǝ yinǝ Cau Amsǝban ngga gir mǝɓoarne kǝ̀rkǝ́r!”*

16 Sǝa ma aɓwana kat sǝ ak man yi Cau Amsǝban ngga ɗang. Acemǝnana Ishaya, mǝɓangna mala Ɓakuli nǝ ɓamuri ka, bangnga ama: “Mǝtalabangngo, ya ɓwa na ear nǝ cau ma’sǝm le?” 17 Ace mani ka, paɓamuru ka kǝ yiu aɓa ok cau, Cau Amsǝban mala Kǝrǝsti mǝnana à ham ni ka. 18 Sǝ ǝn ɗiban nǝma: nggǝari ka, à ok ce re? E, à ongnga:

“Cau ka angngǝna ɓanza kat, acau malea kutikina arǝ aban, kya bwal masǝlata ɓanza.”

19 Sǝ ǝn nggǝ ɗiban ɗǝm nǝma: “Nggeari ka, amǝ Isǝrayila bwalta ce rè? E, à bwalte, acemǝnana a nza mala Musa ka, Ɓakuli bangnga ama, “Mǝ nǝ tsǝa, wu nǝ pak nɓali arǝ aɓwana mǝnana à karǝ kǝgir raka, Mǝ nǝ tsǝa bum wun nǝ lullo, arǝ cili anzali mǝnana à surǝ kǝgir raka.”

20 Ɗǝm ngga Ishaya nacau nǝ rǝcanda ama, “Aɓwana mǝnana à altam raka, à nda à kumam ngga. Ən lǝmndǝ ɓamurǝam aban aɓwana mǝnana à ɗi cem raka.”

21 Sǝ amur amǝ Isǝrayila ka, Ɓakuli na ama, “Ən mǝn abuam aɓa pwari kat ace ak amǝnia yi amǝ mgbikiru andǝ amǝ’murcanda” ka.

11

Ɓwamuru mala Ɓakuli amur Isǝrayila

1 Ən ɗiban ama, nggeari ka, Ɓakuli ginǝna aɓwana male lè? Awo, ginia ɗang! Nggearǝ mim nǝ ɓamurǝam ngga, mǝ nda ɓwa Isǝrayila, mǝkau mala Ibǝrayim, a tau mala Benjami. 2 Awo, ko bǝti, Ɓakuli ginǝ aɓwana male mǝnana tària a tita ɓanza ka ɗang. Ɓalǝ wun kasǝ arǝ cau mǝnana Malǝmce na, aban mǝnana Iliya ɓua aban Ɓakuli amur amǝ Isǝrayila ama, 3 “Mǝtalabangngo, à walǝna lú ka amǝ’ɓangna mo, sǝ à arkina abanperi mo; kǝ mǝ nda nǝmuram ǝn ueo ka, sǝ à ndo à kǝ altam, à nǝ̀ wal-luem gbal ka” rè. 4 Sǝ a man sǝ Ɓakuli pǝlǝ wi ɗe? Ne wi ama, “Mǝ ndanǝ aɓwana á-tongno-nong-ɓari (7,000) mǝnana à ɓumbi Ba’al raka.” e 5 Kǝ nda anggo yalung, aɓwana na kam kpakyok mǝnana ɓwamuru mala Ɓakuli tària ka. 6 Sǝ ɓǝ nda ace ɓwamuru mala Ɓakuli ka, lǝmndǝ ama pà ace aturo-ɓoarna mǝnana aɓwana pak ka ɗang. Ɓǝ̀ ana raka, ɓǝ́ ɓwamuru mala Ɓakuli ka pà nǝ̀ duk ɓwamuru ɓafo ɗang.

7 Sǝ ado ka mana sǝm bang le? Ani sǝ ce pa, bangula amǝ Isǝrayila ka, à kum ɓwamuru mala Ɓakuli mǝnana à alkiyite ka ɗang. Aɓwana aɓalia mǝnana Ɓakuli tàrria ka, à nda à kum ngga. Acilia ka ɓabumia tǝra, à mgbikiru arǝ tunǝban mala Ɓakuli. 8 Kǝla mǝnana Malǝmce na ka,

“Ɓakuli cia a ntulo mǝdǝmbǝre, pea wia amǝsu mǝnana à pà nǝ̀ sǝnban ɗang, andǝ akiru mǝnana à pà nǝ̀ okban raka, ba yalung.”

9 Nyar ɗǝm ngga Dauda na ama, “Ɓǝ̀ likiali malea dupia wia gir’swarban aban ká kpa aɓa gbǝli, ɓǝ̀ dupia wia tali annda, sǝ ɓǝà kum mǝɓane mǝnana karǝ aria ka!

10 Pǝnda ɓǝ gir amǝshia, ace mǝnana ɓǝa kǝa sǝnban ɗang, sǝ ɓǝa ueo aɓata dǝmbǝria mala atanni malea, málá male pà kàm ɗang.”

Aɓwana mǝnana amǝ Isǝrayila na raka à kum amsǝban

11 Ən ɗiban ɗǝm nǝma, nggearǝ annda mǝnana amǝ Isǝrayila annda sǝ à kpa ka, à kpana anggo à pà nǝ̀ lo re? Awo, pa anggo ɗang! Ata cau mala cauɓikea malea ka, amsǝban yina aban aɓwana mǝnana arǝ acili anzali ka, ace mǝnana yia amǝ Isǝrayila ka ɓǝa dum nǝ mɓali arǝ amǝno yia ɓwana ka. 12 Ɓǝ̀ cauɓikea mala amǝ Isǝrayila yinì ɓanza nǝ kume, sǝ ɓǝ acili aɓwana arǝ anzali kumǝna auwa, ata cau malea mǝnana à pak cauɓikea ka, ɗenyi nǝ ulang atsǝkbu mǝnana à nǝ̀ kumia ace nyare malea aban Ɓakuli kat ka!

13 Mǝ nda rǝ na wun cau ado, wun aɓwana mǝnana amǝ Yahudi na raka. Acemǝnana mǝ nda mǝmishan mana à tasam aban wun ngga, ǝn nggǝ gusǝlǝ ce turo mem. 14 Aɓa mǝno anggo ka, ǝn nggǝ earce nǝma, ɓǝ̀ nǝ̀ gandǝ pa ka, mǝ nǝ tsǝk amǝ Isǝrayila ɓǝa dum nǝ mɓali, acemǝnana ɓǝ ǝn amsǝ aɓwana aɓalia ka. 15 Ɓǝ̀ ginǝban mǝnana Ɓakuli ginia ka yinǝ amsǝban aban acilia aɓwana a ɓanza ka, lang sǝ ea nǝ pa? Nǝ̀ duk pa yilǝmu aban aɓwana mǝnana à wuna ka!

16 Sǝ acemǝnana Ibǝrayim andǝ acilia aɓwana mala Ɓakuli mana a pwarian ngga amǝfele na ka, anggo gbal sǝ amǝkea nǝ pa, à nǝ̀ duk amǝfele. Sǝ ɓǝ̀ anlere nggun ngga amǝfele na ka, nggearǝ abuí gbal ka amǝfele na.

17 Ɓakuli ginǝkina pas ata amǝ Yahudi kǝla mǝnana à kǝ kpalǝki abu nggun ngga. Sǝ wun aɓwana mǝnana amǝ Yahudi na raka, wun mǝnana Ɓakuli angngǝna wun ngga, wu nda kǝla abu-nggun muru-bondo mǝnana à zwaɓia arǝ nggun-ɓala ka. Wu angnga ban came mala aɓea bu-nggun mǝnana à kpalǝkia arǝ nggun-muru-ɓala ka. Ace mani ka, wu ongngǝna banɓoarna tsǝkbu mala Ɓakuli mǝnana pa ace Ibǝrayim andǝ amǝkè ka. 18 Ace mani ka, wu kǝa nggori ace zwaɓi mǝnana à zwaɓi wun, wu akban came mala abu nggun mǝnana à kpalǝkia ka ɗang. Wu nda mǝnana wu bwalkiyi nlere nggun ngga ɗang, nlere nggun nǝ bwalkiyi wun.

19 Sǝ wun ngga, wu nǝ na ama, “E, abu nggun ngga à kpalǝkia ace mǝnana ɓǝa zwaɓiam ari ka.” 20 E, mǝnia ka mǝsǝcaua, à kpalǝki abu nggun mǝno ace ɗwanyi paɓamuru malea nǝ mǝsǝcau aban Kǝrǝsti. Sǝ pǝla à zwaɓi wun acemǝnana wu pa ɓamur rǝwun ngga. Sǝ paɓamuru ma’wun ɓǝ kǝa tsǝk wun, wu dum nǝ twalɓamuru ɗang, wu dum nǝ ɓanggi Ɓakuli. 21 Sǝ ɓǝ Ɓakuli kpalǝki abu nggun mǝnana a lo andǝ nggun ngga, sǝ nǝ wun mǝnana à zwaɓi wun nǝ zwaɓio ka le?

22 Wu sǝn pemǝɓoarne andǝ ɓinǝce mǝɓane mala Ɓakuli. Ɓashi male na hakrak arǝ aɓwana mǝnana à pak mǝɓane ka, sǝ wun ngga kǝ paka wun mǝɓoarne, ɓǝ wu lidǝmba aɓa pemǝɓoarne male ka. Ɓǝ ana raka, wun gbal ka nǝ̀ kpali wun. 23 Sǝ ɓǝa amǝ Isǝrayila nǝ ɗeki mgbikiru malea, à nǝ̀ paɓamuria ka, à nyare à nǝ̀ zwaɓia ɗǝm, acemǝnana Ɓakuli na nǝ rǝcanda nǝ nyeshia, nǝ lanjia arǝ nggun mǝnana à kashia ari ka. 24 Amasǝlate ka, wun aɓwana mǝnana amǝ Isǝrayila na raka, wu nda kǝla abu-nggun muru-bondo mǝnana à kashia, a yi zwaɓia arǝ nggun muru ɓala, mǝnana ɓoaro ɓǝa pe anggo raka. Sǝ amǝ Isǝrayila ka, à nda kǝla nggun-muru-ɓala; sǝ pà nǝ̀ kwambi Ɓakuli ɗang, mana nǝ nyeshia, kǝla abu nggun mǝnana a kashia ka, nǝ cia ɗǝm aban came malea ka.

Ɓwamuru mala Ɓakuli amur aɓwana kat

25 Wun amǝ’eamrǝaru, Ən nggǝ earce ɓǝ wu surǝ mǝnia yi cau sǝmbǝra mǝnana adyan ngga ka, Ɓakuli pusǝni abanfana ka, ace mǝnana wu kǝa dum nǝ twalɓamuru ɗang: Murcanda mǝnia yipi amǝ Isǝrayila ka, nǝ̀ ngga malâ ɓǝ laki mala aɓwana mǝnana amǝ Isǝrayila na raka, mǝnana à nǝ̀ kum amsǝban mala Ɓakuli, yi lumsǝna ka. 26 Sǝ ɓǝ̀ mǝno yi pangngǝna anggo ka, amǝ Isǝrayila kat à nǝ̀ kum auwa. Kǝla mǝnana Malǝmce na ka:

“Mǝ’amsǝban ngga, nǝ̀ pur a Urǝshalima; nǝ̀ pǝlǝ mur amǝ Isǝrayila ɓǝa puri ɗwanyi surǝ Ɓakuli. 27 Sǝ mǝnia ka nǝ duk kurcau mem sǝnia ama, mǝ nǝ twalia wia ban acauɓikea malea.”

28 Acemǝnana amǝ Isǝrayila ɓinǝ ce Cau Amsǝban ngga, à dumǝna aɓimǝbura mala Ɓakuli, sǝ mǝno ka, nda ace ɓoaro ma’wun, wun aɓwana mǝnana amǝ Isǝrayila na raka. Sǝ ata cau mala twalban mala Ɓakuli mǝnana tàr akeà ɓǝà duk aɓwana male ka, kǝ earcea piu. 29 Acemǝnana Ɓakuli ka kǝ nggaɗi ɗenyicau male arǝ aɓoro andǝ tunǝban male acea aɓwana, mǝnana nǝ̀ é aria ɗǝm ngga ɗang. 30 Ɗiɗyal ka, wun aɓwana mǝnana amǝ Isǝrayila na raka, wu ndaka amǝ mgbikiru aban Ɓakuli; sǝ adyan ngga wu kumǝna ɓwamuru, acemǝnana amǝ Isǝrayila lǝmndi Ɓakuli mgbikiru ka. 31 Aɓa njar mǝ’mwashati gbal ka, yia amǝ Isǝrayila a dyan ngga à nda ɓa mgbiki Ɓakuli kiru, ace mǝnana kǝla mǝnana à lǝmnda wun ɓwamuru ka, yia gbal ka, à nǝ̀ kum ɓwamuru. 32 Ɓakuli ka, tsǝk aɓwana kat aɓata kurban mala mgbikiru, acemǝnana nǝ lǝmndia wia ɓwamuru male ka.

Ɓwangsǝban aban Ɓakuli

33 E, gulo mala kume mala Ɓakuli, andǝ sǝle, andǝ sure male ka, kàné pà kàm ɗang! Yana nǝ gandǝ mǝnggi ɓalǝ anê male! Yana ɓwe nǝ gandǝ surǝ anjar male! 34 “Yana surǝ ɓabum Mǝtalabangngo? Yana ɓwe nǝ gandǝ pe wi cau?” 35 “Sǝ yana ɓwe pe Ɓakuli kǝgir, mǝnana kǝ earce ɓǝ Ɓakuli mbwe ka?” 36 Agirbunda kat ka, à pur nǝ bani, sǝ nǝ rǝcanda male sǝ agir kat pa, sǝ à nda ace gulo male. Gulo kat ka, ɓǝ duk male masǝlate pà kàm ɗang! Amin.

12

Turo mala amǝkwaɗi aban Ɓakuli andǝ aɓwana

1 Ace mani ka, wun amǝ’eambam, ǝn nggǝ zǝmba wun, nǝ ɓwamuru mala Ɓakuli, wu pa rǝwun aban Ɓakuli, ɓǝ̀ duk ɓoro mǝ’yilǝmui, mǝfele, mǝnana nǝ pwasǝbum Ɓakuli ka. Mǝnia ka nda peri ma’wun abani aɓa Bangngo. 2 Wu kǝa kpata ɓealu andǝ kuncau mala mǝnia yi ɓanza ka ɗang. Wu ɗeki Ɓakuli ɓǝ nggaɗi ɗenyicau ma’wun ɓǝ duk bǝshe. Anggo sǝ wu nǝ gandǝ surǝ nê mala Ɓakuli, mǝnana mǝɓoarne na, andǝ mǝnana nǝ pwasǝbumi, sǝ mǝnana nda pepè ka.

3 Nǝ ɓwamuru mǝnana à pam ngga, ǝn nggǝ zǝmbi koyan ata wun ngga, ɓǝ kǝa twal ɓamuri kǝrkǝr ɓǝ kuti bancame male ɗang. Ɓǝ̀ ɗenyicau mala ɓweni ka, ɓǝ̀ kara arǝ paɓamuru male mǝnana Ɓakuli pe wi ka. 4 Kǝla mǝnana nggun ru ka abare na pas, sǝ koya bare ka turo male na ɗàng ngga, 5 anggo, aɓa Kǝrǝsti, sǝm mǝnana sǝm nda pas ka, sǝm dumǝna ngguru mwashat, sǝ sǝm nda ace rǝarǝ sǝm. 6 Sǝm ndanǝ aɓoro ɗàng-ɗáng aɓa ɓwamuru mǝnana Ɓakuli pa sǝm ngga. Ɓǝ mo yi ɓoro nda na gì Ɓakuli ka, pe anjari mǝnana kara arǝ paɓamuru mo ka; 7 ɓǝ̀ pakia aɓwe turo na ka, wu kǝ pe aɓa mǝsǝcau; ɓǝ kanigir na ka, wu kǝ kania aɓwe gir; 8 ɓǝ ɓakɓabum aɓwana na ka, wu kǝ pak turo ɓakɓabum; ɓǝ pabu na ka, wu kǝ pè nǝ ɓabumo mwashat; ɓǝ turo lidǝmba nǝ aɓwana na ka, wu kǝ pe nǝ ɓabumpina; sǝ ɓǝ lǝmndǝ ɓwamuru na ka, wu kǝ̀ lǝmndi nǝ banɓoarnado.

Do mala mǝkpata Ɓakuli aɓa earcearu

9 Earcearu ka, ɓǝà pè nǝ mǝsǝcau. Wu ginǝki ɓealɓikea, sǝ wu bwal gir mǝnana mǝɓoarne na ka kangkang. 10 Wu earce rǝarǝwun nǝ earceban mǝ’mǝsǝcauì. Ɓǝ ban ɓǝ ɓoara wun arǝ pe rǝarǝwun gulo. 11 Ce wu duk amǝ’nkundǝr, amǝ’ɗwanyi rǝɓǝla arǝ turo ɗang, wu duk amǝ bumpina aɓa paki Mǝtalabangngo turo nǝ ɓabum wun kat. 12 Wu dum nǝ banɓoarnado aɓa tsǝkɓalu ma’wun; wu dum nǝ munyi aɓa tanni; wu do aɓa pak hiwi ko ya pwari. 13 Wu kǝ pabu ace bwalia aɓwana mala Ɓakuli mǝnana à nda aɓa tǝle ka; wu kani ak abǝri.

14 Wu tsǝki aɓwana mǝnana à kǝ pa wun tanni ka bu; wu tsǝkia wia bu, ce wu suia ɗang. 15 Wu pak banɓoarnado wunǝ aɓwana mǝnana à kǝ pak banɓoarnado ka; wu ɓua wunǝ aɓwana mǝnana à kǝ ɓua ka. 16 Wu do aɓa dotaru mala amǝ’eamrǝaru; wu kǝa twal ɓamur rǝwun ɗang; wu dum nǝ earce kpapi ɓamuru wunǝ aɓwana mǝnana aɓwe twali à pà kun ɓe kǝ gir raka. Wu kǝa twali kǝla wu kuti aɓwe nǝ sǝle ɗang.

17 Ce wu nyeshì kǝ ɓwa ɓealɓikea ace ɓealɓikea ɗang. Wu pak gir mǝnana nǝ lǝmndi aɓwe kat pe’mǝɓoarne ma’wun ngga. 18 Ɓǝ nǝ gandǝ pa ka, wu dukdo aɓa dorǝpwala wunǝ aɓwana kat. 19 Wun amǝ’eambam mǝnana ǝn earkiyicea ka, wu kǝa pak mǝɓane akun mǝɓane mǝnana à paka wun ngga ɗang, wu nyinggi Ɓakuli mbwe tangnakusu. Acemǝnana Mǝtalabangngo bangnga aɓa Malǝmce ama, “Mbwe tangnakusu ka mem na, mǝ nǝ mbwe.” 20 Akun mani ka,

“Ɓǝ ɓio mǝbura na aɓa nzala ka, pe wi girliana; ɓǝ mǝsamur wali ka, pe wi mur ɓǝ nu. Ɓǝa kǝ pa anggo ka, a nǝ rambi wi nkalang bǝsa mǝ earke amuri.”

21 Wu kǝa eari ɓealɓikea ɓǝ li murǝm amur wun ɗang, wu li murǝm amur ɓealɓikea nǝ pe’mǝɓoarne.

13

Pagulo aban aɓwana mǝnana a cia amur wun ngga

1 Ko ya ɓwa ka ɓǝ nyesǝ ɓamuri aɓata aɓwana mǝnana à pea wia gara yalban ngga, acemǝnana ɓe kǝ gara-murǝm pà kàm mǝnana pur nǝ ban Ɓakuli raka; sǝ aɓwana mǝnana à bwalkiyi gara-murǝm ado ka, Ɓakuli nǝ cia. 2 Ace mani ka, ɓwa mǝnana kat mgbicau aria, ndarǝ mgbicau arǝ gir mǝnana Ɓakuli nǝ kwaki te ka. Sǝ aɓwana mǝnana kat à mgbicau aria ka, à nǝ̀ nunmbi ɓamuria ɓashi. 3 Ayalban ngga à cia ace pa ɓangciu aban aɓwana mǝnana à kǝ pak mǝɓoarne ka ɗang, she aban amǝɓealɓikea. Ɓǝ a kǝ́ earce ama à pà nǝ dum nǝ ɓangciu aria raka, pak gir mǝnana mǝɓoarne na ka, sǝ yia ka à nǝ̀ ɓwangso. 4 Amǝ’yalmuru ka, aɓwana na mǝnana Ɓakuli nǝ cia ace pako gir mǝɓoarne ka. Sǝ ɓǝ a kǝ́ pak mǝɓane ka, dumǝna pup ɓangciu nǝ pako, acemǝnana à pania wia rǝcanda mala pàtanni. Yia ka amǝturo na mǝnana Ɓakuli cia ace pea amǝ pak mǝɓane tanni ka. 5 Ace mani ka, wu pa ɓamur rǝwun aɓatea. Ko ɓǝ pa ace ɓanggi pàtanni raka, wu pè acemǝnana wu sǝlǝna ama ndanǝ ɓoaro ɓǝ wu nyesǝ ɓamur rǝwun aɓatea.

6 Ɗǝm ngga, nda gir mǝnana tsǝa sǝ wu kǝ mbwe boalo-cemi ka, acemǝnana yia ayalban ngga Ɓakuli nǝ cia aɓa turo, sǝ boalo ka nda mǝnana nǝ̀ bwalia kam ɓǝà pa rǝcanda andǝ bumia are turo mǝnana à pakkiyi kat ka. 7 Wu pea aɓwana kat, agir mǝnana à kǝ kpani ata wun ngga: wu pea wia boalo cemi mala ɓamur rǝwun andǝ boalo cemi mala agir kuma ma’wun. Wu kǝ lǝmndia wia gusǝlǝban andǝ pa gulo kat.

Lǝmndi aru earcearu

8 Wu kǝa eare ɓǝ kǝɓwa kpata wun nǝ kǝgir ɗang. She earcearu mǝnana dumǝna pup wu nǝ lǝmndia rǝ wun ngga. Ɓwa mǝnana kǝ earce ɓi mǝmurkala ka, lumsǝna Nggurcau mala Ɓakuli. 9 Anzongcau mǝnana ama, “Ka nongnǝban a nza ɗang,” “Ka wal-lú ɗang,” “Ka iun’i ɗang,” “Ka sham gir mala ɓwa ɗang,” andǝ aɓea mǝnana kat à ndakam ngga, à nda à kpapia aɓa nzongcau mwashat ama, “Earce ɓio mǝmurkala kǝla mǝnana a earce ɓamuro ka.” 10 Earcearu pa nǝ̀ paki kǝɓwa mǝɓane ɗang. Ace mani ka, ɓwa mǝnana ndanǝ earcearu arǝ aɓwana ka, nda rǝ lumsǝ anzongcau kat mǝnana aɓa Nggurcau mala Ɓakuli ka.

11 Dumǝna pup wu nǝ pa anggo, acemǝnana wu surǝna rǝ nza mǝnia sǝm nda aɓali ka. Pwari pangngǝna mǝnana wu nǝ loapi ntulo ka, acemǝnana amsǝban ma’sǝm yina ado tu, amur mǝnana sǝm tita pana ɓamur sǝm ni ka. 12 Du málá nǝ̀ mala; ban málá nǝ̀ kwaro. Ɓǝ̀ sǝm nying paki agir mala pǝnda, ɓǝ̀ sǝm oasǝ agirbura mala tǎlaban. 13 Ɓǝ sǝm dukdo ɓealu ɓoarnsari kǝla aɓwana mǝnana à nda aɓa tǎlaban mala pwari ka; pà aɓa nukiagir ko wal wale, andǝ kiɗiki mala nonggi nǝ rǝaru ko alta banɓoarnado mala paki agir kǝsǝkya, andǝ munǝki-amuno ko nɓali ka ɗang. 14 Akun mani ka wu oasǝ Mǝtalabangngo Yesu Kǝrǝsti arǝ wun, sǝ wu kǝa ká nǝ́ ɗenyicau ma’wun arǝ alita ngguru njar mala loasǝ anpel male ɗang.

14

Kǝa ɓashì mǝ’eambo ɗang

1 Mǝkwaɗi mǝnana pànǝ rǝcanda aɓa paɓamuru male aban Ɓakuli raka, wu é, sǝ wu kǝa kutia makgir andi amur agir mǝnana aɓwe kat sǝ à eare amuri raka ɗang. 2 Paɓamuru mala ɓe ɓwa ka, eari wi ɓǝ li gir mǝnana kat sǝni girlina na ka, sǝ ɓwa mǝnana gatti aɓa paɓamuru male ka, kǝ mbu ka gir mǝnana à lambi, nyama pa ari raka, nda nǝ̀ gandǝ li ka. 3 Ɓwa mǝnana kǝ li ka gir kat ka, ɓǝ kǝa nyesǝ ɓwa mǝnana li ka gir kat raka, ɓa ɗang. Sǝ ɓwa mǝnana gbal agir na kat likiyia raka, ɓǝ kǝa nyesǝ ɓwa mǝnana likiyi agir kat, ɓa ɗang; acemǝnana Ɓakuli ka, angngǝnia yia kǝm. 4 Sǝ a nda yan, mǝnana a nǝ ɓashi mǝturoɓala mala ɓe ɓwa ka? Mǝturoɓala ka mǝtalaɓala male na nǝ kashi ɓashi ka, ko nǝ kpa ko nǝ came. Sǝ yi ka, nǝ kum kusǝ-came, acemǝnana Mǝtalabangngo nǝ gandǝ ci ɓǝ came.

5 Ɗǝm ngga, ɓe ɓwa kǝ twal ɓe pwari nǝ gulo amur acilia apwari, sǝ ɓe ɓwa ka kǝ twal apwari kat ka à nda mwashat. Koyan ngga ɓǝ sǝla ama ko ɓǝ mǝye na twalo a sǝne male ka, ɓǝ kpate anggo. 6 Aɓwana mǝnana à gusǝlǝ ɓe pwari ace peri aban Mǝtalabangngo ka, à pa anggo ace pe Mǝtalabangngo gulo. Aɓwana mǝnana à nǝ̀ gandǝ li ko ya ulang girlina nani ka, à pè ace gusǝlǝ Mǝtalabangngo, acemǝnana à kǝ paki Ɓakuli yauwa ace girline. Sǝ aɓwana mǝnana à ɓinǝ li ka aɓea girlina ka, à pa anggo gbal, ace pe Mǝtalabangngo gulo, andǝ pak yauwa aban Ɓakuli. 7 Kǝɓwa pà aɓalǝ sǝm mǝnana dupi ɓamuri, ko a na raka, nǝ wuki ɓamuri ka ɗang. 8 Ɓǝ sǝm ndanǝ yilǝmu ka, nda ace gusǝlǝ Mǝtalabangngo, sǝ ɓǝ sǝm wu gbal ka, nda ace gusǝlǝ Mǝtalabangngo. Lǝmndǝ ama, ko sǝm ndanǝ yilǝmu, sǝ ko sǝm wu ka, sǝm nda ka mala Mǝtalabangngo.

9 Nda àkǝ̀ ce mǝnia sǝ Kǝrǝsti wú, sǝ lo nǝ yilǝmu, acemǝnana ɓǝ duk Mǝtalabangngo amur aɓwana mǝnana à wuna ka, andǝ aɓwana mǝnana à ndanǝ yilǝmu ka. 10 Sǝ we ado ka, palang sǝ a kǝ ɓashi mǝ’eambo? Palang sǝ a kǝ nyesǝ mǝ’eambo ɓa? Sǝm kat ka, sǝm nǝ ngga came a ɓadǝm buno ɓashi mala Ɓakuli. 11 Malǝmce bangnga ama,

“ ‘Kǝla mǝnana kangkang mǝ ndakam nǝ yilǝmu ka,’ Mǝtalabangngo kǝ na, ‘koya nkunu ka, nǝ ɓun a ɓadǝmbam, sǝ koya lasu ka nǝ bangnga ama Mǝ nda Ɓakuli.’ ”

12 Mǝno ka lǝmnda ama ko yana ata sǝm ngga, nǝ bǝl kuni nǝ ɓamuri aban Ɓakuli. Ka tsǝk mǝ’eambo ɓǝ anndǝ́ ɗang.

13 Ace mani ka, ɓǝ sǝm nying ɓashi rǝarǝ sǝm. Ɓoaro male ka, ɓǝ sǝm twali a ɓabum sǝm ama pà sǝm nǝ pak ɓe kǝgir mǝnana nǝ tsǝki amǝ’eamrǝaru gir annda, ko nǝ tamshia aɓa kwaɗi malea ka ɗang. 14 Tārú mem sǝnǝ Mǝtalabangngo Yesu ka, ǝn yi sǝla, sǝ ǝn earǝna ama, kǝ girlina pa kàm mǝnana mǝɓane na nǝ ɓamuri ka ɗang; sǝama ɓǝ ɓwa sǝni sǝ na ama girlina ka ɓoaro ɓǝ li raka, abani ka dumǝna mǝɓane. 15 Ɓǝ a tsǝk mǝ’eambo sǝ banɓiki wi nǝ girlina mǝnana a li ka, lǝmndǝ ama a kǝ pak gir aɓa earcearu ɗang. Kǝa eare girlina mǝnana a kǝ li ka, ɓǝ tsǝk mǝ’eambo mǝnana Kǝrǝsti wu ace ka, ɓǝ kiɗiki ɗang! 16 Ka nying gir mǝnana a twali mǝɓoarne na ka, ɓǝa ɓwe na mǝɓane amuri ɗang. 17 Acemǝnana domurǝm mala Ɓakuli ka, cau mala li girlina na andǝ nuki agir ɗang. Nda ace do nǝ cauɓoarna, andǝ dorǝpwala, andǝ banɓoarnado aɓa Bangngo Mǝfele. 18 Bwa mǝnana kat kǝ paki Kǝrǝsti turo nǝ ulang mǝnia yi ɓealu ka, nǝ kum akban mala Ɓakuli, sǝ aɓwana nǝ earni gbal.

19 Ace mani ka, ɓǝ sǝm ɓariki arǝ paki agir mǝnana à nǝ̀ yinǝ dorǝpwala andǝ dotaru mala ɓak rǝ’arǝ sǝm ngga. 20 Wu kǝa kiɗiki turo mala Ɓakuli nǝ cau mala girlina ɗang. Agirlina kat ka amǝɓoarne na, sǝ ɓoaro ɓǝ ɓwa li girlina mǝnana nǝ tsǝk ɓe ɓwa ɓǝ kpa aɓa cauɓikea ka ɗang. 21 Nǝ ɓoaribani wu nying li nyama andǝ nu murɓǝla-nggun anap, andǝ koya gir nani kat mǝnana nǝ tsǝk mǝ’eambo nǝ kpa aɓa cauɓikea ka.

22 Ace mani ka, ɓǝ ko mana sǝ nda gir mǝnana a earni amur amǝno yi agir ka, ɓǝ do a nre wun wunǝ Ɓakuli. Tsǝkbu mala Ɓakuli na amur ɓwa mǝnana pà nǝ múrhalǝkia arǝ pak gir mǝnana sǝlǝna ama nda pepe ka ɗang. 23 Sǝ ɓwa mǝnana ɗenyicau male kǝ danggǝli arǝ li gir, sǝ kutia li girí ka, pangngǝna cauɓikea, acemǝnana pe male ka, pa nǝ ɓabum mǝsǝcau ɗang, sǝ gir mǝnana kat ɓwa pe, pa aɓa mǝsǝcau raka, cauɓikea na.

15

Wu pwasǝbum aɓwana

1 Sǝm mǝnana sǝm ndanǝ rǝcanda ka, ɓoaro ɓǝ sǝm bwali aɓwana mǝnana à gatti ka, ce sǝm lǝmndǝ earce ɓamuru ɗang. 2 Koyan aɓalǝ sǝm ngga ɓǝ̀ kǝ̀ ɗenyi nǝ ɓi mǝmurkala, sǝ ɓǝ̀ kǝ̀ paki wi mǝɓoarne mǝnana nǝ loashi aɓa paɓamuru ka. 3 Ko nggearǝ Kǝrǝsti ka dukdo pwasǝbum ɓamuri ɗang. Kǝla mǝnana Malǝmce bang ngga, “Asangban mala aɓwana mǝnana à sangngo ka, We Ɓakuli, à sulǝna amuram.” 4 Agir mǝnana à gilia kat aɓa Malǝmce ɗiɗyal ka, à gilia ace kwarkir sǝm, ace mǝnana nǝ ɓakɓabum andǝ munyi mǝnana sǝm nǝ kumo aɓa cau mala Malǝmce ka, sǝm nǝ dum nǝ tsǝkɓalu.

5 Sǝ Ɓakuli mǝnana pākiyi gandǝru andǝ girikiban ngga, ɓǝ̀ pa wun ɓabum dotaru arǝarǝ wun, wu kǝ kpate ulang pe mala Kǝrǝsti Yesu. 6 Sǝ anggo ka, wun atarǝ wun kat ka, wu nǝ ɓwangsǝ Ɓakuli, yi Tar Mǝtala sǝm Kǝrǝsti Yesu, nǝ giu mwashat.

Cau Amsǝban ace aɓwana arǝ nzali

7 Ace mani ka, wu ak rǝarǝ wun, kǝla mǝnana Kǝrǝsti ak wun ngga, ace mǝnana mǝnia ka, nǝ yinǝ ɓwangsǝban aban Ɓakuli. 8 Mǝ nda aban bangga wun ama, turo mala Kǝrǝsti mǝnana yi pak ka, pè ace amǝ Yahudi ace lǝmndǝ ama Ɓakuli ka mǝ’mǝsǝcau na arǝ apacau male mǝnana pea akea ka, 9 sǝ acemǝnana aɓwana arǝ acili anzali ka, à nǝ̀ ɓwangsǝ Ɓakuli ace ɓwamuru male, kǝla mǝnana Malǝmce bangnga ama,

“Ace mǝnia ka mǝ nǝ ɓwangso aɓalǝ aɓwana arǝ acili anzali; mǝ nǝ tukia anggyal ɓwangsǝ lullo.” 10 Ɗǝm ngga bangnga ama, “Wun aɓwana arǝ acili anzali, wu pak banɓoarnado atarǝ wun, wunǝ aɓwana mala Ɓakuli.”

11 Nyar ɗǝm ngga bangnga ama, “Wun aɓwana mala acili anzali kat, wu ɓwangsǝki Mǝtalabangngo. Wun aɓwapǝnda kat, wu ɓwangsǝki!”

12 Ɗǝm ngga, Ishaya bangnga ama, “Mǝkau mala Jeshi nǝ yiu; nǝ yia duk murǝm amur aɓwana arǝ acili anzali, Aɓwana mǝnana amǝ Isǝrayila na raka à nǝ̀ tsǝk ɓalia ari.”

13 Ɓǝ̀ Ɓakuli mǝpa tsǝkɓalu lumsǝ wun nǝ banɓoarnado, andǝ dorǝpwala, aɓa paɓamuru ma’wun abani, ace mǝnana ɓǝ wu lumsǝ nǝ tsǝkɓalu nǝ bu rǝcanda mala Bangngo Mǝfele.

Bulǝs Mǝmishan aban ká aɓwana arǝ anzali

14 Wun amǝ’eambam, mim nǝ ɓamurǝam ngga ǝn sǝlǝna nǝma wu lumsǝna nǝ pe mǝɓoarne, wu ndanǝ sǝlǝ kat, wu nǝ gandǝ kania rǝwun. 15 Mim ngga aɓa cautera mǝnia ka, ǝn bangga wun cau bwang amur aɓea gir, ɓangciu pa aram ɗang, ace kasǝɓalǝ wun. Ən gilǝ mǝnia ka ace ɓwamuru mala Ɓakuli mǝnana lǝmndam sǝ twalam 16 mǝ duk mǝturo mala Kǝrǝsti Yesu aban aɓwana arǝ acilia nzali ka. Ɓakuli twalam ace mǝnana mǝ pak turo kǝla pǝris, aban hamnǝ Cau Amsǝban male. Sǝ aɓa mǝno anggo ka aɓwana arǝ acilia nzali ka ɓǝa duk ɓoro mǝnana gir’a na aban Ɓakuli, yia aɓwana mǝnana Bangngo Mǝfele tarǝnia ace Ɓakuli ka.

17 Ace mani ka, ǝn nggǝ nggori nǝ Kǝrǝsti Yesu aɓa turo mem aban Ɓakuli. 18 Amuri ka, ǝn nggori nǝ kǝgir ɗang, she kǝ gir mǝnana Kǝrǝsti pe nǝ buam aban yinǝ aɓwana mala acili anzali, aban oki Ɓakuli nǝ cau mǝnana ǝn hamni andǝ turo mǝnana ǝn pe aɓalia, 19 nǝ rǝcanda mala paki agirndǝlǝki andǝ agirgyambǝliban, andǝ rǝcanda mala Bangngo mala Ɓakuli ka. Anggo sǝ ǝn hamnǝ Cau Amsǝban mala Kǝrǝsti aɓa gya mem kat, twal a Urǝshalima kya bwal a Ilirikum. 20 Mǝnia ka nda cau mǝnana ǝn twal a ɓabumam ngga, ɓǝ ǝn hamnǝ Cau Amsǝban mala Kǝrǝsti aban mǝnana à malaka oe kam raka, ace mǝnana mǝ ngga ɓakɓa amur kusǝɓa mala ɓe kǝ ɓwa ɗang. 21 Sǝ, kǝla mǝnana à gìlì aɓa Malǝmce ka:

“Aɓwana mǝnana à malaka banggia wia cau male raka, à nǝ̀ sǝn mǝsǝcau male, sǝ aɓwana mǝnana à malaka ok raka, à nǝ̀ bwalte.” 22 Ɓafo ka, ǝn gandǝ kum dǝmbu ǝn yiu aban wun ɗang, acemǝnana mǝ nda aban hamnǝ cau arǝ amǝnia yia aban ngga.

Bulǝs tsǝa a ɓabumi nǝ ká a Roma

23 A dyan ngga, ɓe kǝgir uekam mǝnana mǝ nǝ pa a bu ka anzali mǝnia ka ɗang, sǝ acemǝnana mǝ ndanǝ ɗenyi a ɓabumam arǝ apǝla pas nǝma mǝ nǝ yiu aban wun ngga, 24 ǝn kanìna mǝ nǝ pǝla aban wun, ɓǝ mǝ nǝ kutio aban ká a Sǝpen ngga. Mǝ nǝ sǝn wun, yale wu nǝ tsǝktam aban ka abanì, anzǝm mǝnana ǝn dumǝna aban wun zuku ka. 25 Sǝ ado ka, mǝ nda amur njar aban ká Urǝshalima nǝ gbasha aban amǝ’kpata Yesu mǝnana abanì ka. 26 Acemǝnana amǝ’kpata Ɓakuli mǝnana a Masǝdoniya andǝ Akaya ka, à pa ɓoro nǝ banɓoarnado, ɓǝa kya pea amǝtǝr mǝnana à nda aɓalǝ amǝ’kpata Ɓakuli a Urǝshalima ka. 27 Ban ɓoaria wia nǝ pâ mǝnia yi ɓoro ka, acemǝnana à sǝlǝna ama dumǝnia wia kǝla tangna mǝnana à nǝ̀ mbwe ka. Sǝ ɓǝa aɓwana mǝnana amǝ Yahudi na raka, à yi kumo aɓalǝ agir mǝnana Bangngo pea amǝ Yahudi ka, dumǝnia wia gbal ama ɓǝa pe amǝ Yahudi agirkuma malea. 28 Ɓǝ ǝn pana mǝnia yi boalo, ǝn lumsǝna turo mǝɓoarne malea, sǝ ɓǝ mǝ nǝ ká a Sǝpen ngga, mǝ nǝ kenye mǝ nǝ sǝn wun peatu. 29 Ən sǝlǝna nǝma ɓǝ mǝ nǝ yiu aban wun ngga, mǝ nǝ yinà wun nǝ tsǝkbu mǝgule mala Kǝrǝsti.

30 Ən nggǝ zǝmba wun, wun amǝ’eambam, aɓa lullǝ Mǝtalabangngo Yesu Kǝrǝsti sǝ nǝ earcearu mǝnana Bangngo kǝ pa ka, wu bwalam nggam aɓa pak hiwi aban Ɓakuli acem. 31 Wu pak hiwi ama, ɓǝ ǝn api turo mǝɓike mala amǝ mgbikiru aɓa nzali Yahudi. Wu pak hiwi ɗǝm ama amǝ’kpata Ɓakuli mǝnana a Urǝshalima ka, ɓǝa kum ɓabum ak ɓoro mǝnana ǝn nggǝ kánia wia ni ka. 32 Anggo, nǝ eare mala Ɓakuli, mǝ nǝ yiu aban wun nǝ banɓoarnado mǝgule, sǝ sǝm nǝ do ata rǝ sǝm kat nǝ bumpwasa. 33 Adyan ngga, yi Ɓakuli, mǝtala dorǝpwala ɓǝ do ata wun. Amin.

16

Makkiakun

1 Ən nggǝ lǝmndǝ mǝ’nggaula sǝm Fibi aban wun, acemǝnana yi ka mǝ bwalturo ɓa ndahiwi na a Senkǝria. 2 Wu gingshi, wu é aɓa lullǝ Mǝtalabangngo, kǝla mǝnana ɓoaro ɓǝa paki mǝ’kpata Ɓakuli ka. Wu bwali wi kam aɓa gir mǝnana kat nǝ earce ka. Acemǝnana yi ka nggea gbasha mǝgule na aban ɓwapǝnda a là, sǝ nggearǝ mim ngga pangngǝnam mǝɓoarne.

 

3 Ən nggǝ tasǝ makkun mem aban Pǝrisǝla andǝ Akila, aɓeam amǝturo, aban turo mala Kǝrǝsti Yesu. 4 Yia ka à pa yilǝmia, ɓǝ à wuna acem. Ən pakia wia yauwa. Nggearǝ mim nǝmuram ɗang, a’ikǝlisiya kat mala acili anzali, à kǝ pakia wia yauwa.

5 Wu makki Ikǝlisiya mǝnana kǝ kpapi a ɓala malea ka kun.

Wu makki Epenetus, gyajam mem mǝnana ǝn earkiyi ace raka kun. Yi ka, nda ɓwa mǝnana tita ak Kǝrǝsti a bu-nzali Asiya ka.

6 Wu makki Maryamu kun, yi mǝnana pak turo kǝrkǝr ace wun ngga.

7 Wu maki Andǝronikus andǝ Junia kun, aɓǝla mem mǝnana sǝm nda a ndakurban sǝnia ka. Yia ka, amǝ’mishan suria pepè, sǝ yia ka, à akam dǝmba ak Kǝrǝsti.

8 Wu makki Ampǝliyatus kun, ɓwa mem aɓa kpata Mǝtalabangngo.

9 Wu makki Urǝbanus kun, ɓi sǝm mǝturo mala Kǝrǝsti, andǝ Sǝtakis gyajam mem mǝgule.

10 Wu makki Apeles kun, yi ɓwa mǝnana à mwamǝni sǝ à earǝna nǝ paɓamuru male aɓa Kǝrǝsti ka.

Wu makki amǝ ɓala mala Aristobulus kun.

11 Wu makki ɓǝla mem, Herodiyon kun.

Wu makki aɓwana mala Mǝtalabangngo mǝnana a ɓala mala Narkisus ka, kun.

12 Wu makki Tǝrafena andǝ Tǝrafosa, amamǝna mǝno à paki Mǝtalabangngo turo kǝ̀rkǝ́r ka kun.

Wu maki Pasis kun yi ɓeam mǝnana ǝn earkiyi ace raka, sǝ yi dǝm ngga ɓe mɓwana na mǝnana paki Mǝtalabangngo turo nǝ rǝcanda male kat ka.

13 Wu makki Rufus kun, yi mǝnana Mǝtalabangngo tàrì ɓǝ duk male ka. Wu makki ngge kun, acemǝnana yi ka bwalam kǝla muni gbal.

14 Wu makki Asǝnkǝritus, andǝ Filigon, andǝ Hamis, andǝ Patrobas, andǝ Hamas andǝ amǝ’eambia mǝnana abania ka kun.

15 Wu makki Filologus, andǝ Juliya, andǝ Nerius andǝ mǝ’eambi muna-mɓwama, andǝ Olimpas andǝ acilia amǝ’kpata Ɓakuli mǝnana abania ka kun.

16 Wu makki arǝ wun kun, nǝ kur rǝaru mala amǝ’kpata Ɓakuli.

Amǝkwaɗi mǝnana arǝ a’ikǝlisiya mala Kǝrǝsti kat à kǝ makka wun kun.

Masǝlata amakkiakun mala Bulǝs

17 Ən nggǝ zǝmba wun ɗǝm, wun amǝ’eambam, wu tsǝk kir wun arǝ aɓwana mǝnana à kǝ yinǝ gakia aɓalǝ wun, sǝ à nǝ̀ tsǝk wun a ɓwarki tanjar, nǝ akanigir mǝnana à nda ɗàng andǝ mǝnana à kania wun ngga. Wu nyia zak, ce wu sung abania ɗang! 18 Acemǝnana à ulang aɓwana mǝno ka, à pà aban paki Mǝtala sǝm Kǝrǝsti turo ɗang, turo nzal kunia na à nakiyi ce ka. Nǝ kunɓoarna andǝ nacau mǝɓukɓuki sǝ à kǝ ɓosǝki ɗenyicau mala aɓwana mǝnana à surǝ kǝ gir raka. 19 Ɓwapǝnda kat ongngǝna ce okiru ma’wun, sǝ ban kǝ ɓoaram ace mani. Ən nggǝ earce nǝma wu duk amǝ sǝle arǝ gir mǝnana mǝɓoarne na, sǝ ɓǝ wu dum nǝ ɗwanyi cau aru arǝ gir mǝnana mǝɓike na ka.

20 Ɓakuli mǝ pà dorǝpwala málá nǝ parki Shetan aɓa kusǝ wun.

Ɓǝ ɓwamuru mala Yesu Mǝtala sǝm do ata wun.

21 Timoti, ɓeam mǝturo, kǝ makka wun kun. Anggo gbal sǝ Lukiyus, andǝ Jasǝn, andǝ Sosipata, aɓǝla mem, à kǝ makka wun kun.

22 Mim Tatiyus mǝnana gilǝ mǝnia yi cautera ka, ǝn nggǝ makka wun kun aɓa lullǝ Mǝtalabangngo.

23 Gayus, ɓwa mǝnana ǝn sula ɓala male, sǝ a ɓala male sǝ amǝ’kpata Ɓakuli mana akani kǝ̀ kpapi ka, kǝ̀ makka wun kun.

Erastus, mǝ tsǝk boalo mala nggeala, andǝ mǝ’eam sǝm Kwartus, à kǝ makka wun kun.

24 [Ɓǝ̀ ɓwamuru mala Yesu Kǝrǝsti Mǝtala sǝm, do ata wun. Amin.]

Mǝsǝlata hiwi nǝ ɓwangsǝkiban

25 Ɓǝ sǝm pe Ɓakuli gulo! Acemǝnana nǝ gandǝ tsǝk wun, wu nǝ cam nǝ rǝcanda aɓa paɓamuru ma’wun aban Yesu Kǝrǝsti, kǝla mǝnana ǝn hamnǝ Cau Amsǝban male, sǝ kǝla mǝnana à yi lǝmndǝ cau mǝ’mǝsǝcauì mǝnana nda sǝmbǝra ɓara-ɓara ka. 26 Sǝ adyan ngga, mǝnia yi mǝsǝcau ka, a Malǝmce mala amǝ’ɓangna mala Ɓakuli mǝnana à gilia ka, à yi pusǝna ce abanfana. Ado ka, aɓa ne mala Ɓakuli mǝnana te malkiyi raka, mǝnia yi cau ka à yi bǝlǝna ɓali aban akún mala ɓanza kat, à surǝni, ace mǝnana yia gbal ka ɓǝa paɓamuria, ɓǝa kpate.

27 Aban kǝ Ɓakuli nǝmuri, mǝnana kǝ yi mwashat nda mǝsǝle kat ka, ɓǝ gulo pa, nǝ bu Yesu Kǝrǝsti, málá male pà kàm ɗang! Amin.

 

a1:17 Ko Ɓwa mǝnana kumǝna akban aban Ɓakuli ka, nǝ dukdo guli arǝ Ɓakuli.

b3:26 Ko ɓǝa esǝki acauɓikea malea mǝnana à ramba amuri ka, ɓǝa kum akban abani.

c4:10 Kasǝ-ɓatau aban amǝ Yahudi ka nda lǝmnda ama ɓwa ka mala Ɓakuli na.

e11:4 Ba’al ka nda ɓakuli mǝ’nyirì.

Posted in Uncategorized | Leave a comment